საფრანგეთის პრეზიდენტმა ემანუელ მაკრონმა თქვა, რომ ჩინეთის მიერ კორონავირუსის გავრცელებასთან გამკლავების თაობაზე ბევრი კითხვა არსებობს და ბევრი რამ მოხდა “რაზეც არაფერი ვიცით”.

მიამიტურია იმის თქმა, რომ ჩინეთი უკეთ უმკლავდება კრიზისს – განაცხადა მან Financial Times-თან ინტერვიუში. კითხვაზე, ავლენს თუ არა ჩინეთის ავტორიტარული მიდგომა ვირუსის შეკავებასთან დასავლური დემოკრატიის სისუსტეს მაკრონმა თქვა, რომ ღია საზოგადოებასა და იმ ქვეყანას შორის, სადაც სიმართლეს მალავენ შედარება არ არის:

“ამ განსხვავებების გათვალისწინებით, გადაწყვეტილებების, რომელიც ჩინეთმა მიიღო, და იმის, რაც ჩინეთში დღეს ხდება, პატივისცემის მიუხედავად, მიამეტები არ უნდა ვიყოთ და ვთქვათ, რომ უკეთ უმკლავდებიან კრიზისს. ჩვენ არ ვიცით. აშკარად, მოხდა რაღაცები, რაც არ ვიცით.”

მაკრონმა თქვა, რომ პანდემიასთან ბრძოლაში თავისუფლებების დათმობა დასავლურ დემოკრატიებს საფრთხეს უქმნის:

“ამას ვერ მივიღებთ. ჯანდაცვის კრიზისის გამო შენს ფუნდამენტურ დნმ-ზე უარს ვერ იტყვი.”

მანამდე საფრანგეთში ჩინეთის საელჩოს ვებ-გვერდზე გამოქვეყნდა სტატია იმის თაობაზე, რომ დასავლური ქვეყნები ასაკოვან მოქალაქეებს მოხუცთა სახლებში სიკვდილისთვის წირავენ. ამის გამო ჩინეთის ელჩი საგარეო საქმეთა სამინისტროში გამოიძახეს. ჩინეთი მთავრობის სპიკერმა თქვა, რომ საფრანგეთის მხრიდან ვირუსის გამკლავებაზე ნეგატიური კომენტარის გაკეთბა არ სურდათ და გაუგებრობა მოხდა.

ამჟამად საფრანგეთში დადასტურებულია კორონავირუსით დაავადების 165,027 შემთხვევა. დაიღუპა 17,920 ადამიანი, გამოჯანმრთელდა 32,812.

.