თბილისის მედიცინის ინსტიტუტის კლინიკაში კარანტინია გამოცხადებულ. ახალი კორონავირუსით ინფიცირებულია მედპერსონალის ხუთი წარმომადგენელი

კლინიკის ერთ ექიმსა და სამ საშუალო მედპერსონალს ვირუსი ერთერთი საშუალო მედპერსონალისგან გადაედო. მედიის ინფორმაციით, ეს საშუალო მედპერსონალი ინფიცირებული სასულიერო პირის  დაა. ამ ინფორმაციას არ უარყოფს არც ბოჭორიშვილის კლინიკა, სადაც სასულიერო პირი და მისი ოჯახის წევრები მკურნალობენ. 

“მე გიდასტურებთ ერთ რამეს – კლინიკის შიგნით ვირუსი გავრცელდა ჩვენი თანამშრომლისგან, რომელიც არის საშუალო მედპერსონალი, არის ინფიცირებული და იყო ასიმპტომური. სასულიერო პირია თუ არა მისი ძმა, ეს არ არის ჩემთვის ცნობილი,”- ამბობს კლინიკის მთავარი ექიმი ლევან ყურაშვილი

ბოჭორიშვილის კლინიკის სამეთვალყურეო საბჭოს დირექტორმა, მაკა სოლოღაშვილმა, დაადასტურა, რომ სასულიერო პირს ახალი კორონავირუსი დაუდასტურდა და ის და მისი ოჯახის წევრები სწორედ ბოჭორიშვილის კლინიკაში მკურნალობენ. 

საპატრიარქოს პრესსპიკერმა, დეკანოზმა ანდრია ჯაღმაიძემ ტაბულას დაუდასტურა, რომ ინფიცირებულმა სასულიერო პირმა რამდენიმე დღის წინ ღვთისმსახურება ჩაატარა. 

ამ დროისათვის საქართველოში კორონავირუსის 296 დადასტურებული შემთხვევაა. აქედან 68 გამოჯანმრთელდა, 3 კი გარდაიცვალა. 

ქვეყანაში გამოცხადებული საგანგებო მდგომარეობისა და ფაქტობრივი საკარანტინო რეჟიმის მიუხედავად, ეკლესიებში ყოველ კვირას იმართება წირვა, რომლის მიწურულსაც მრევლი ერთი კოვზით ეზიარება. 12 აპრილს მრევლს უთხრეს, რომ კომენდანტის საათის მიუხედავად, ჩვეულ რეჟიმში ჩატარდება  სააღდგომო ღამის ლიტურგია. 13 აპრილს მთავრობის წევრები საპატრიარქოში იმჰყოფებოდნენ.