კორონავირუს COVID-19-ის გავრცელების გამო აფხაზეთის დე ფაქტო მთავრობის მიერ შექმნილმა ოპერატიულმა შტაბმა განაცხადა, რომ პნევმონიის დიაგნოზით სოხუმის რესპუბლიკურ საავადმყოფოში მოთავსებულ 15 წლის ბიჭს, რომელიც 8 აპრილს გარდაიცვალა, კორონავირუსი არ ჰქონდა.

შტაბის ინფორმაციით, ლაბორატორიულმა კვლევამ უარყოფითი შედეგი აჩვენა. ამავე შტაბის განცხადებით, ბიჭს 7 წლის ასაკიდან ჰქონდა ფილტვების სერიოზული პრობლემა.

ოკუპირებული აფხაზეთის დე ფაქტო მთავრობის ცნობით, ამ დროისთვის დადასტურებულია COVID-19-ით დაავადების ორი ფაქტი.

დე ფაქტო ხელისუფლება პირველ შემთხვევად თვლის გაგრელ მამაკაცს, რომელიც ცოტა ხნის წინ მოსკოვში იმყოფებოდა. მას კორონავირუსი 7 აპრილს დაუდგინეს. 8 აპრილს, ე.წ. ოპერატიულმა შტაბმა განაცხადა, რომ COVID-19 დაუდასტურდა ამ პირთან კონტაქტში მყოფ მამაკაცს.

დე ფაქტო პრეზიდენტის მოვალეობის შემსრულებელმა, ვალერი ბგანბამ გაგრაში გამოაცხადა კომენდანტის საათი, რომელიც საღამოს 8-დან დილის 7 საათამდე მოქმედებს.

დე ფაქტო ხელისუფლება აფხაზეთში COVID-19-ის პირველ შემთხვევად არ თვლის კორონავირუსით გალის რაიონის სოფელ საბერიოს მკვიდრის დაავადებას. 50 წლის ქალი რუსეთიდან ოკუპირებულ აფხაზეთში 29 მარტს დაბრუნდა. მას უკვე აღენიშნებოდა კორონავირუსის სიმპტომები. იმავე ღამით, პაციენტს დანარჩენ საქართველოსთან 14 მარტიდან დაკეტილი ე.წ. საზღვარი გაუხსნეს. ქალი ზუგდიდის ინფექციურ საავადმყოფოში მოათავსეს. 30 მარტს თბილისის „ლუგარის ლაბორატორიამ“ დაადასტურა, რომ პაციენტს COVID-19 აქვს.