„კორონა ვირუსის გავრცელების პრევენციის მიზნით, სამეგრელო-ზემო სვანეთის სკოლებში, ბაღებში, საზოგადოებრივ ტრანსპორტში და სასკოლო ავტობუსებში სადეზინფექციო სამუშაოები იწყება” – ამის შესახებ ინფორმაციას სამეგრელო-ზემო სვანეთის სამხარეო ადმინისტრაცია ავრცელებს.
“სპეციალური ხსნარით დამუშავდება რეგიონის სახელოვნებო სკოლები. სამუშაოების დროული შესრულებისა და მეტი კოორდინაციისთვის სახელმწიფო რწმუნებულის ადმინისტრაციამ დროებით სამუშაო ჯგუფი შექმნა, რომელშიც ყველა მუნიციპალიტეტის მერი, საკრებულოს თავმჯდომარე, რესურსცენტრები და საზოგადოებრივი ჯანდაცვის ცენტრები შევლენ. პრემიერ-მინისტრის ხელმძღვანელობით კორონა ვირუსთან დაკავშირებით მოქმედმა უწყებათაშორისმა საბჭომ გასცა რეკომენდაცია საზოგადოებრივი თავშეყრის ადგილებში ხალხმრავალი ღონისძიებების გაუქმების შესახებ. აღნიშნული ინფორმაცია უკვე მიეწოდათ ადგილობრივ თვითმმართველობებს. სამეგრელო-ზემო სვანეთის რეგიონში დედის დღის და 8 მარტის ღონისძიებები, სადაც კონცერტები და სხვა ხალხმრავალი ღონისძიებები იყო დაგეგმილი უქმდება” – აღნიშნულია ადმინისტრაციის მიერ გავრცელებულ განცხადებაში.