ამერიკის შეერთებული შტატების ახლად დანიშნული ელჩი კელი დეგნანი საქართველოს სახელმწიფო უსაფრთხოების სამსახურის(სუს) უფროსს, გრიგოლ ლილუაშვილს შეხვდა.
სუს-ის ინფორმაციით, „მხარებმა ხაზი გაუსვეს ამერიკის შეერთებულ შტატებსა და საქართველოს შორის უსაფრთხოების სფეროში მტკიცე პარტნიორული ურთიერთობების მნიშვნელობას და ისაუბრეს ამ მიმართულებით არსებული თანამშრომლობის კიდევ უფრო მეტად გაღრმავების შესაძლებლობებზე“.
გრიგოლ ლილუაშვილმა და კელი დეგნანმა ილაპარაკეს უსაფრთხოების მხრივ საქართველოს წინაშე არსებულ გამოწვევებსა და რეგიონულ საფრთხეებზე. ყურადღება გამახვილდა საქართველოს სახელმწიფო უსაფრთხოების სამსახურსა და აშშ-ის შესაბამის სახელმწიფო უწყებებს შორის წარმატებულ თანამშრომლობასა და სამომავლო გეგმებზე.
კელი დეგნანი უფლებამოსილების შესრულებას 31 იანვრიდან შეუდგა. პირველი სამუშაო კვირის განმავლობაში აშშ-ის ელჩი შეხვდა საქართველოს პრეზიდენტს, პრემიერ-მინისტრს, პარლამენტის თავმჯდომარეს, საგარეო საქმეთა, თავდაცვის და შინაგან საქმეთა მინისტრებს, პარტია „ქართული ოცნების“ თავმჯდომარეს და კათოლიკოს-პატრიარქს.