“ტვ. პირველის” დამფუძნებელი ამბობს, რომ ხელისუფლება მას მამის სიცოცხლით ევაჭრება. მიზანი კი მისივე თქმით. კრიტიკული ტელევიზიის გაჩერება და ზეწოლაა.
განცხადება წერეთელმა კლინიკაში გააკეთა, სადაც ხანგრძლივი და ფორსირებული დაკითხვების შემდეგ ბიზნესმენი ავთო წერეთელი უგონო მდგომარეობაში შეიყვენეს.
ბიზნესმენს ფულის გათეთრებას ედავებიან, თუმცა წერეთლების თქმით, საქმეს პოლიტიკური სარჩული აქვს.
“ჩემს ოჯახს სიცოცხლეშივე გამოუტანეს სასიკვდილო განაჩენი. გუშინ გადავრჩით. ბრძოლა კი გრძელდება უკეთესი ქვეყნისთვის და უკეთესი საქართველოსთვის. ეს მხოლოდ ჩემი ოჯახის ბრძოლა არ არის, ეს ბრძოლაა უკეთესი მომავლისთვის.
პირადად ამ ტელევიზიისთვის ადამიანის ცხოვრებით და ჯანმრთელობით მევაჭრებიან”- აცხადებს ვატო წერეთელი.
რაც შეეხება პაციენტის მდგომარეობას, მედიკოსების თქმით, ავთანდილ წერეთლის ჯანმრთელობის მდგომარეობა სტაბილურია, თუმცა ანალიზებში ცვლილებები შეინიშნება.
კლინიკა „ჰელსიკორის“ გენერალური დირექტორის რუსუდან ლაგვილავას ინფორმაციით, პაციენტის გაწერა უახლოესი დღეების განმავლობაში არ იგეგმება.
„ვაგრძელებთ გამოკვლევებს და შესაბამისი მკურნალობა მიმდინარეობს. უახლოეს დღეებში მისი კლინიკიდან გაწერა არ იგეგმება. ამ ეტაპზე ქირურგიულ ჩარევას არ საჭიროებს. გუშინ ღამე ჩაუტარდა კორონაროგრაფია. ავთანდილ წერეთელი საერთოდ ჩვენი კლინიკის პაციენტია. მას კორონაროგრაფია რამდენიმე თვის წინაც ჩაუტარდა ჩვენს კლინიკაში და რომ შევადარეთ, ცვლილებები არის. ერთი სისხლძარღვი 50%-ით არის შევიწროვებული, მაგრამ ამ ეტაპზე ექიმმა გადაწყვიტა, რომ სტენტირება არ იყო გასაკეთებელი. კრეატინინი არის ძალიან მაღალი, რაც ნიშნავს, რომ არის თირკმლის პრობლემაცაა და ვაგრძელებთ კვლევას”,-განაცხადა რუსუდან ლაგვილავამ.
ცნობისთვის, ბიზნესმენი ავთანდილ წერეთელი კლინიკაში გუშინ საღამოს უგონო მდგომარეობაში შეიყვანეს.