სომხეთის უშიშროების სამსახურის ყოფილი ხელმძღვანელი, გეორგი კუტოიანი სომხეთის დედაქალაქ ერევნის ერთ ბინაში მკვდარი ნახეს. საგამოძიებო კომიტეტის წარმომადგენლის თანახმად, კუტოიანის გვამი ნახეს ერევნის ჩრდილოეთში, საცხოვრებელი არეალის ერთ ბინაში. მას მიყენებული ჰქონდა ჭრილობა ცეცხლსასროლი იარაღიდან.

საგამოძიებო კომიტეტის წარმომადგენელმა, ნაირა ჰარუთიუნიანმა ფეისბუკით გაავრცელა ეს ცნობა. მას არ განუმარტავს, 38 წლის კუტოიანმა თავი მოიკლა თუ ვინმემ ესროლა.

მოგვიანებით, საგამოძიებო კომიტეტის ხელმძღვანელის მოადგილემ, არტურ მელიქიანმა განაცხადა, რომ აღძრულია სისხლის სამართლის საქმე „თვითმკვლელობამდე მიყვანის“ მუხლით.

მაგრამ, თქვა მელიქიანმა, ეს არ ნიშნავს, რომ გამოძიების სხვა მიმართულებასაც არ განვიხილავთ, მათ შორის, მკვლელობის და მკვლელობის შენიღბვის ჩათვლით. მანვე განაცხადა, რომ შემთხვევის ადგილზე ნაპოვნი იყო 40-ზე მეტი მასრა და ტყვია.

განათლებით იურისტი, კუტოიანი სარქისიანის ასისტენტად მუშაობდა 2011 წლიდან, სანამ, მას, 2016 წელს, მოულოდნელად არ აირჩევდნენ უშიშროების სამსახურის ხელმღვანელად.

ის დაუყოვნებლივ იქნა თანამდებობიდან განთავისუფლებული 2018 წლის მაისში, როცა გამოსვლების შემდეგ ხელისუფლებაში მოვიდა ნიკოლ ფაშინიანი, სომხეთის ახალი პრემიერ-მინისტრი. კუტოიანს მას მერე საჯარო განცხადება არ გაუკეთებია და მანამდეც თავშეკავებული და შეუმჩნეველი ფიგურა იყო.

სარქისიანმა გააკეთა განცხადება კუტოიანის მკვლელობის შესახებ და თქვა, რომ გამოძიება გულმოდგინედ უნდა წარიმართოს „საზოგადოების კონტროლის ქვეშ“

კუტოიანი უშიშროების სფეროს მაღალი რანგის ოფიციალური მეორე პირია, რომელიც ბოლო ოთხ თვეში მოკლეს.

ჰაიაკ ჰარუთიუნიანი, სომხეთის პოლიციის ყოფილი უფროსი, მისი აგარაკზე ნახეს მოკლული სექტემბერში. გამოძიების თანახმად, მას ტყვია თავში ჰქონდა მოხვედრილი და გამომძიებლები თვითმკვლელობას ვარაუდობენ. სიკვდილამდე ჰარუთიუნიანი არაერთხელ დაჰკითხეს 2008 წლის არჩევნების შემდგომი ძალადობის თაობაზე.

საგანგებო საგამოძიებო სამსახურმა, რომელიც იძიებს ამ საქმეს, არმენპრესს უთხრა, რომ კუტოიანი არასოდეს დაუკითხავთ არც როგორც მოწმე და არც როგორც ეჭვმიტანილი.