ადამიანის უფლებებს სწავლებისა და მონიტორინგის ცენტრს (EMC) ევროსასამართლოსგან ოფიციალურად ეცნობა, რომ სასამართლოს გადაწყვეტილებით, საქმეზე „მაჩალიკაშვილები და სხვები საქართველოს წინააღმდეგ“, ე.წ. სადავო პროცედურების განხილვა დაიწყო,- ამის შესახებ ინფორმაციას ადამიანის უფლებებს სწავლებისა და მონიტორინგის ცენტრი (EMC) ავრცელებს.

როგორც EMC- ში განმარტავენ, ეს იმას ნიშნავს, რომ ევროსასამართლოს მიერ, მხარეებისთვის მიცემული 12 კვირიანი ვადა, მეგობრული მორიგების შესაძლებლობის განსახილველად ამოიწურა და მხარეებმა მორიგებაზე უარი განაცხადეს.

„სადავო პროცედურების ფარგლებში, მთავრობას განესაზღვრა ვადა 2020 წლის 31 მარტამდე ევროსასამართლოს წარუდგინოს საკუთარი მოსაზრებები მაჩალიკაშვილების ოჯახის განაცხადთან დაკავშირებით, ასევე უპასუხოს სასამართლოს მიერ დასმულ კითხვებსა და მოთხოვნებს.

შეგახსენებთ, რომ ევროპულმა სასამართლომ საქმეზე „მაჩალიკაშვილები და სხვები საქართველოს წინააღმდეგ“ მთავრობასთან კომუნიკაცია 2019 წლის 23 სექტემბრის გადაწყვეტილებით დაიწყო. ევროპულმა სასამართლომ, მაჩალიკაშვილების ოჯახის განაცხადში დაყენებულ ყველა მუხლთან დაკავშირებით კითხვებით მიმართა მთავრობას და მოითხოვა თემირლან მაჩალიკაშვილის სიცოცხლის მოსპობის საქმეზე მიმდინარე გამოძიების მასალების, მათ შორის სპეცოპერაციის დაგეგმვასა და განხორციელებასთან დაკავშირებული დოკუმენტების წარდგენა.

მაჩალიკაშვილების ოჯახის განაცხადი ადამიანის უფლებათა ევროპულ სასამართლოს 2019 წლის 6 ივნისს წარედგინა. მოსარჩელეები დავობენ ადამიანის უფლებათა ევროპული კონვენციის მე-2 (სიცოცხლის უფლება), მე-3 (წამების, არაადამიანური და ღირსების შემლახავი მოპყრობის ან დასჯის აკრძალვა) და 13-ე მუხლების (უფლება ეფექტიანი სამართლებრივი დაცვის შიდა საშუალებებზე) სავარაუდო დარღვევაზე. კერძოდ, განმცხადებლების მითითებით, 2017 წლის 26 დეკემბერს სოფელ დუისში სპეცოპერაციის ჩატარებისას თემირლან მაჩალიკაშვილის წინააღმდეგ გამოიყენეს არაპროპორციული და გაუმართლებელი ლეტალური ძალა, რაც ეწინააღმდეგება კონვენციის მე-2 მუხლს ოჯახის წევრები ასევე დავობენ კონვენციის მე-3 მუხლის დარღვევაზე, სპეცოპერაციის განსაკუთრებით აგრესიულ და დამამცირებელ გარემოებებში წარმართვის გამო. დამატებით, განმცხადებლები მიუთითებენ, რომ სახელმწიფომ ვერ უზრუნველყო ზემოთ მითითებული გარემოებების თაობაზე ეფექტიანი გამოძიების ჩატარება, რაც კონვენციის მე-2 და მე-3 მუხლების პროცედურული ნაწილისა და მე-13 მუხლის დარღვევას წარმოადგენს.

თემირლან მაჩალიკაშვილის სიცოცხლის ხელყოფის საქმის მიმართ საზოგადოებაში არსებული მაღალი ინტერესის გათვალისწინებით, ევროპულ სასამართლოში საქმის წარმოებასთან დაკავშირებულ სიახლეებს EMC საზოგადოებას რეგულარულად მიაწვდის.

მაჩალიკაშვილების ოჯახის ინტერესებს ევროპული სასამართლოს წინაშე იცავს ადამიანის უფლებების სწავლების ცენტრი (EMC) და მისი საერთაშორისო პარტნიორი ორგანიზაცია – ადამიანის უფლებათა დაცვის ევროპული ცენტრი (EHRAC),“- აღნიშნულია EMC-ის მიერ გავრცელებულ ინფორმაციაში.