ზუგდიდის მუნიციპალიტეტის საკრებულოს სხდომა, სადაც 2020 წლის ბიუჯეტზე მსჯელობდნენ, საკრებულოს ოპოზიციურმა დეპუტატებმა პროტესტის ნიშნად დატოვეს. ფრაქცია “ევროპული საქართველოს” თავმჯდომარე ბათლომე შელიამ განაცხადა, რომ, სანამ ქვეყანაში პოლიტიკური სტაბილურობა არ იქნება, არანაირ ბიუჯეტს აზრი არა აქვს. მან ენმ-ის ოფისის დარბევაზე ისაუბრა და მუნიციპალიტეტის მერი გიორგი შენგელია მის დაგეგმვაში დაადანაშაულა. შელიას თქმით, სწორედ გიორგი შენგელიას კაბინეტში დაიგეგმა აქცია. საკრებულოს თავმჯდომარე მამუკა წოწერიამ დეპუტატის სხდომის დატოვების მოტივად ბიუჯეტისთვის “წუნის არქონა” დაასახელა. უმრავლესობამ ბათლომე შელიას ბოქლომების შტურმი შეახსენა. ბათლომე შელიას თქმით, ბოიკოტის რეჟიმში არ იქნება მისი პარტია იანვრიდან, ის აპირებს თვითმმართველობის ყველა ნაბიჯი გააკონტროლოს.

მანამდე შენიშვნები ქონდა ბიუჯეტთან დაკავშირებით ენმ-ს წევრს პაატა ადამიას, მისი თქმით, ბიუჯეტის სახელფასო ფონდისთვის 14 მილიონ ნახევარია გამოყოფილი. მთლიანად, ააიპი და მერია ერთად 21 მილიონი ლარი. გამოდის, რომ ბიუჯეტის ნახევარი ხელფასებს ხმარდება. ადამიას გიორგი შენგელიამ განუმარტა, რომ  ეს არ არის სტანდარტული ბიზნესი, და რომ აქ ააიპ-ები მოსახლეობას აუცილებელ სერვისებს აწვდიან და მოგებაზე გათვლილი ბიუჯეტი ვერ იქნება.

2020 წლის ბიუჯეტი 41 მილიონ ლარს შეადგენს, რაც შარშანდელზე 6 მილიონი ლარით მეტია.