დიდი ოდენობით ქრთამის აღებისთვის პატიმრობაში მყოფ ზუგდიდის ყოფილ მერს პენიტენციალურმა სამსახურმა უქმე დღეებში დაწესებულების დატოვების უფლება გაუუქმა. “ამ ადამიანმა ვერ გამოავლინა ის ქცევა, რაც გულისხმობს დანაშაულის გაცნობიერებას და შესაბამისად, გარეთ გასვლის შეღავათი აქვს გაუქმებული”,- აცხადებენ უწყებაში. პატიმრობაში მყოფი ზუგდიდის ყოფილი მერი ლაშა გოგია რესტორანში იმყოფებოდა. ფოტო სოციალურ ქსელ “ფეისბუქში” მისმა მეუღლემ ნანა თოდუამ გამოაქვეყნა. პენიტენციალურ სამსახურში აცხადებდნენ, რომ პატიმრობა მისჯილ ზუგდიდის ყოფილ მერს და ყოფილ ვიცე მერს, ლაშა გოგიას და გია გულორდავას უქმე დღეებში ციხის დატოვების უფლება ჰქონდათ. ზუგდიდის მუნიციპალიტეტის ყოფილი მერი და მისი მოადგილე თბილისის საქალაქო სასამართლომ დამნაშავედ ცნო დიდი ოდენობით ქრთამის აღებაში. თითოეულ მათგანს სასჯელის სახით ორი წელი პატიმრობა, 4 წელი კი პირობითი მსჯავრი განესაზღვრა. ისინი შარშან, პირველ ნოემბერს დააკავეს.