ქრისტიანული სამყაროს ნაწილი დღეს შობის დღესასწაულს აღნიშნავს. ყველაზე მასშტაბურად ეს დღე ბეთლემში აღინიშნება. პილიგრიმები მსოფლიოს ყველა ქვეყნიდან ამ დღეს სწორედ იმ ქალაქში ჩადიან, სადაც სახარების მიხედვით, იესო ქრისტე დაიბადა.

25 დეკემბერი განსაკუთრებულად აღინიშნება მსოფლიოს არაერთ ქვეყანაში. ქრისტიანული სამყაროს ნაწილს რომის პაპმა, დედოფალმა ელისაბედმა და სხვადასხვა ქვეყნის პირველმა პირებმა დღესასწაული უკვე მიულოცეს.

ტრადიციული საშობაო მესა რომის პაპმა წმინდა პეტრეს ტაძარში აღავლინა. პაპმა ფრანცისკემ მრევლს სიყვარულისა და მშვიდობისკენ მოუწოდა.

შობა იზეიმეს ბეთლემშიც. ბიბლიურ ქალაქში სადაც ქრისტე დაიბადა ასობით ტურისტი და პილიგრიმი ჩავიდა. მორწმუნეები ტრადიციულ საშობაო მესას მაცხოვრის შობის ტაძარში დაესწრნენ. სადღესასწაულო მესაზე პალესტინის ლიდერი მაჰმუდ აბასიც მივიდა.

შობა აღნიშნეს დიდ ბრიტანეთშიც. დედოფალმა ელისაბედმა ყოველწლიური საშობაო მიმართვა გაავრცელა. ელისაბედ მეორემ ყურადღება ჰარმონიისა და შერიგების მნიშვნელობაზე გაამახვილა.

დღესასწაული იზეიმეს შეერთებულ შტატებში. დონალდ და მელანია ტრამპები შობის დღესასწაულს ფლორიდაში, პრეზიდენტის აგარაკზე შეხვდნენ. თეთრი სახლის ლიდერმა ამერიკელებს შობა მიულოცა და მშვიდობა უსურვა.

ქრისტიანებმა შობა იზეიმეს ჩინეთსა და პაკისტანში. ავსტრალიაში სანტების ფორმებში გამოწყობილმა მაშველებმა საშობაო ნაძვის ხეები სანაპიროზე დადგეს და დღესასწაული დამსვენებლებთან ერთად აღნიშნეს.