საუკეთესო გზა წინსვლისთვის არის კომპრომისი და დიალოგი გამოყენებული უნდა იყოს ამ მიზნის მისაღწევად, – ამის შესახებ ევროკავშირის ელჩმა საქართველოში კარლ ჰარცელმა ხელისუფლებისა და ოპოზიციის შეხვედრის დასრულების შემდეგ ჟურნალისტებთან განაცხადა.
„დიალოგი არ არის ერთადერთი გზა წინსვლისთვის, მაგრამ ჩემი აზრით, საუკეთესო იქნება თუ მოხდება მხარეებს შორის შეთანხმების მიღწევა დიალოგის ფორმატში. ეს კარგი იქნება იმისთვის, რომ საქართველო სწორი ტრაექტორიით წავიდეს მომავალი წლის არჩევნების მიმართულებით. ამ მიზნით ჩვენ მხარს ვუჭერთ პროგრესს ამ ფორმატში“,-განაცხადა ჰარცელმა.
მისივე თქმით, ყველა მხარე თანხმდება, რომ დიალოგი გაგრძელდება, რაც ძალიან მნიშვნელოვანია.
„მნიშვნელოვანია, რომ ყველა მხარე თანხმდება, რომ დიალოგის პროცესი გაგრძელდება. ოთხივე რაუნდზე მხარეებმა სხვადასხვა წინადადებები განიხილეს. ჩვენ გვქონდა მნიშვნელოვანი დისკუსიები. დღეს მივესალმები იმ ფაქტს, რომ მმართველმა პარტიამ წარადგინა წინადადება. შეთანხმება არის ის, რომ გაგრძელდება დიალოგი, რათა ვიხილოთ თუ საით შეგვიძლია დისკუსიები წარვმართოთ მომავალში“,-განუცხადა ელჩმა ჟურნალისტებს.