ბალტიის ქვეყნები, პოლონეთი, საქართველო და უკრაინა ევროსაბჭოს საპარლამენტო ასამბლეას წარსულში ექაჩებიან. რუსული მედიის ინფორმაციით, ამის შესახებ რუსეთის დუმის სპიკერმა ვიაჩესლავ ვოლოდინმა განაცხადა.
„ევროსაბჭოს საპარლამენტო ასამბლეაში არიან რიგი ქვეყნების წარმომადგენლები, რომლებიც, ჩემი აზრით, განწყობილნი არიან, რომ ყველა უკან დააბრუნონ“, – განაცხადა ვოლოდინმა ასამბლეის თავმჯდომარესთან ლილიან მორი პასკიესთან შეხვედრისას.
ასეთ ქვეყნებს შორის, რუსეთის დუმის სპიკერმა, სწორედ ბალტიის ქვეყნები, პოლონეთი, საქართველო და უკრაინა დაასახელა.
„მათ სურთ სხვების ხარჯზე იცხოვრონ და თავად არ ააშენონ თავისი ეკონომიკა და უზრუნველყონ საკუთარი თავი. უკრაინას სურს რუსეთის გაზის ტრანზიტით იცხოვროს, საქართველოს – რუსეთისთვის თავისი ღვინის მიწოდებით“ ,- განაცხადა ვოლოდინმა.
მან გაიხსენა თბილისში, მართლმადიდებლობის საპარლამენტთაშორისო ასამბლეის დელეგაციის ვიზიტი და განაცხადა, რომ დარბაზში „შევარდნენ ნაციონალისტები და დაიწყეს ყვირილი, რომ რუსებმა დაიკავეს მათი პარლამენტი. დაიწყო შეხლა-შემოხლა, შემდეგ კი – მიტინგები. ჩვენი დელეგაცია, პრაქტიკულად, საფრთხის ქვეშ იყო. ჩვენ შევძელით მათი ევაკუაცია, მაგრამ მოწვევა საქართველოს ხელისუფლებისგან იყო“, – განაცხადა ვოლოდინმა.
მისი თქმით, ამისთვის ელემენტარული ბოდიშია მოსახდელი.
რუსული მედიის ინფორმაციითვე, პასკიემ იმედი გამოთქვა, რომ რუსეთსა და საქართველოს შორის ურთიერთობა მშვიდობიან კალაპოტს დაუბრუნდება.