ამ წუთებში ზუგდიდის რაიონულ სასამართლო ნარკოდანაშაულისთვის დაკავებული ბერის გიგა ქავთარაძის მიმართ აღმკვეთ ღონისძიებაზე მსჯელობს.
დაკავებულის ადვოკატის თქმით, ბერი მომხდარს განიცდის როგორც სულიერად, ისე ფიზიკურად და მისი ჯანმრთელობის მდგომარეობა არ არის სახარბიელო. თუმცა, მიუხედავად ამისა, თავად სასულიერო პირის სურვილია დღევანდელ პროცესზე დასწრება.
როგორც დაკავებულის ადვოკატმა განაცხადა, ბერს თავდებში უდგებიან სასულიერო პირები სხვადასხვა ეპარქიიდან, რაც, მათი თქმით, თავდებში დადგომა ეპარქიის გადაწყვეტილებაა.
“სასულიერო პირები მზად არიან თავდებში დაუდგნენ. არ წყდებოდა ზარები. ძალიან ბევრია ისეთი ადამიანი, რომლებიც ამბობენ, რომ ბერი მისაბაძია თავისი წარსულით და ისიც ადამიანია და ყველას დაუდგება ალბათ განსაცდელის ჟამი, და ამ ჟამს ჩვენ ვართო მის გვერდით”, – აღნიშნა ჯიტა გულუამ.
ადვოკატის თქმით, ის სასამართლოს მიმართავს შუამდგომლობით, სასულიერო პირის მიმართ არ გამოიყენოს აღმკვეთი ღონისძიების ფორმად პატიმრობა, თუკი ეს იქნება პროკურატურის მოთხოვნა, რადგან ამის საჭიროება არ არსებობს, რისი დასაბუთებული საფუძვლებიც აქვს.
ბერი გიგა ქავთარაძე და კიდევ ერთი მოქალაქე რომან მალანია ნარკოტიკული საშუალებების შეძენა-შენახვის ბრალდებით დააკავეს. მალანიას ზუგდიდის სასამართლომ საპატიმრო გირაო (10 ათასი ლარის ოდენობით) შეუფარდა.