საპარლამენტო უმრავლესობის ლიდერი მამუკა მდინარაძე ჟურნალისტებთან ამბობს, რომ “აბსოლუტურად უსაფუძვლო აქციები” ეროვნული ვალუტის კურსზე ნეგატიურად მოქმედებს.

“რა თქმა უნდა, ქვეყანაში განვითარებული ნებისმიერი ნეგატიური მოვლენა, მათ შორის ქუჩის აქციები, აბსოლუტურად უსაფუძვლო, მითუმეტეს, გავლენას ახდენს სხვადასხვა ფაქტორებზე, მათ შორის, ლარის კურსზე.”

მდინარაძის თქმით, “სახელმწიფო კურსის შენარჩუნებას ახერხებს” და ვარაუდობს, რომ აქციების დასრულების შემდეგ ლარი გამყარდება:

“სახელმწიფო ახერხებს, რომ შეინარჩუნოს კურსი და ჩვენ გვაქვს მოლოდინი, რომ როდესაც ეს აბსოლუტურად უსაფუძვლო აქციები ჩაცხრება, პირიქით, ჩვენ გვექნება აქ პოზიტიური დინამიკა.”

დღეს, 26 ნოემბერს, მას შემდეგ, რაც საქართველოს ეროვნულმა ბანკმა სავალუტო აუქციონზე 20 მილიონი აშშ დოლარი გაყიდა, ლარი დოლართან 0.4 თეთრით გამყარდა.

ერთი აშშ დოლარის ღირებულება ამჟამად 2,9712 ლარია. 20 ივნისისთვის, როცა თბილისში საპროტესტო გამოსვლები დაიწყო, დოლარი 2.7871 ლარი ღირდა, რის შემდეგაც ეროვნული ვალუტა კიდევ გაუფასურდა და რამდენჯერმე დაეცა ისტორიულ მინიმუმზე.

აღსანიშნავია, რომ ისტორიულ მინიმუმს ლარმა დოლართან მიმართებით 27 სექტემბერს მიაღწია, როცა ზაფხულში დაწყებული გამოსვლების შემდეგ უკვე ერთი კვირა იყო გასული – ერთი აშშ დოლარი მაშინ 2.9808 თეთრი ღირდა. საპროტესტო გამოსვლების განახლებამდე კი კურსი 2.9515-ზე დაბლა არ ჩამოსულა.