ანტიოკუპაციური მოძრაობა “ძალა ერთობაშიას” წევრმა ლაშა ჭიღლაძემ გვიან ღამით საქალაქო სასამართლოს ეზოში, აქციის მიმდინარეობისას ტანსაცმელზე ბენზინი გადაისხა და თავის დაწვა სცადა, თუმცა, მას ამის საშუალება მოძრაობის ლიდერმა დავით ქაცარავამ არ მისცა. სავარაუდოდ, დავით ქაცარავას მიერ დღეს დაანონსებული განცხადება სწორედ ამ ფაქტს უკავშირდება
ორგანიზაციის წევრებმა ლაშა ჭიღლაძეს საწვავის ბოთლი წაართვეს და ჯიბიდან სანთებელის ამოღების საშუალება არ მისცეს.ამის შემდეგ საქმეში სამართალდამცველები ჩაერივნენ და ლაშა ჭიღლაძე უსაფრთხო ადგილას გადაიყვანეს, განარიდეს რა აქციის ტერიტორიას.
როგორც გაირკვა, ლაშა ჭიღლაძე თავის დაწვას პროტესტის ნიშნად აპირებდა, რადგან, მისი ინფორმაციით, პოლიცია იარაღის ჩადებას და დაკავებას უპირებს.
ლაშა ჭიღლაძე, რომელიც ქარელის მუნიციპალიტეტის სოფელ ატოცში მდებარე სახლიდან ორგანიზაციის ყველა წევრზე გვიან გამოვიდა და რომელსაც იქ ყოფნის დროს პოლიციელებმა დენი ჩაუჭრეს, მასზე ზეწოლასა და მუქარაში ქურთის პოლიციის უფროსს თემურ ჟუჟნიაშვილს ადანაშაულებს. აუტოდაფეს მცდელობამდე ლაშა ჭიღლაძემ “ფეისბუქზე” დაწერა, რომ პირადად ჟუჟნიაშვილი მას ემუქრებოდა იარაღის ჩადებითა და დაკავებით.
შეგახსენებთ, მას შემდეგ, რაც ლაშა ჭიღლაძე ატოცის ბაზაზე დენის გარეშე დარჩა და ცეცხლის დანთებასაც ავადმყოფობის გამო ვერ ახერხებდა, ფილტვების ანთებით თბილისის წმინდა მიქაელ მთავარანგელოზის კლინიკაში მოხვდა, სადაც რამდენიმე დღეს მკურნალობდა.
ამჟამად ლაშა ჭიღლაძის ჯანმრთელობის მდგომარეობა დამაკმაყოფილებელია.