ნატო მხარს უჭერს საქართველოს თავის სწრაფვაში გახდეს ჩრდილოატლანტიკური ალიანსის წევრი და ალიანსი დაეხმარება საქართველოს თავდაცვის სისტემის გაძლიერებაში. – განაცხადა ნატო-ს გენერალურმა მდივანმა იენს სტოლტენბერგმა ბრიუსელში ნატოს წევრი ქვეყნების საგარეო საქმეთა მინისტრების სხდომის დაწყებამდე
მან ჩრდილოატლანტიკური ალიანსის წევრებს მოუწოდა სათანადო მხარდაჭერა გაუწიონ შავი ზღვის რეგიონის ქვეყნებს, კერძოდ, უკრაინასა და საქართველოს.
„ჩვენ ვართ პარტნიორები საქართველოსთან და უკრაინასთან შავი ზღვის რეგიონში. მოვუწოდებთ მოკავშირეებს გამოყონ აუცილებელი რესურსები, კადრები, რათა დარწმუნებულები ვიყოთ, რომ ჩვენ ვთავაზობთ პრაქტიკულ დახმარებას უკრაინასა და საქართველოს“, – განაცხადა სტოლტენბერგმა.
მისივე თქმით, შავი ზღვის რეგიონი მნიშვნელოვანია ნატოსთვის და ალიანსი აძლიერებს თავის ყოფნას იქ ბოლო წლების განმავლობაში.
მანვე განაცხადა, რომ ცოტა ხნის წინ, ნატოს ჩრდილოატლანტიკური საბჭო საქართველოსა და უკრაინაში იმყოფებოდა. მისივე თქმით, ალიანსი ურთიერთქმედებაშია უკრაინის სამხედრო-საზღვაო ძალებთან. ჩვენ შევათანხმეთ დახმარების პაკეტი აპრილში, რათა ჩავატაროთ ბევრი სწავლება, გავზარდოთ ინფორმაციის გაცვლა“ – აღნიშნა სტოლტენბერგმა.
„ჩვენ დავეხმარებით და მხარს დავუჭერთ საქართველოს ნატო-ში გაწევრიანების გზაზე. სწორედ ამიტომ, ჩვენ ვეხმარებით მათ თავდაცვისა და უსაფრთხოების ინსტიტუტების მოდერნიზებაში, რეფორმების განხორციელებაში. სწორედ ეს არის საქართველოში ნატო-ს წარმომადგენლობის მიზანი“ განაცხადა გენერალურმა მდივანმა