თბილისის საქალაქო სასამართლოში “ნაციონალური მოძრაობის” პოლიტსაბჭოს თავმჯდომარის ნიკა მელიას პროცესი იწყება. გამოძიება მელიას 20-21 ივნისის მოვლენებისას ჯგუფური ძალადობის ორგანიზებას ედავება.

სასამართლოს გადაწყვეტილებით, ოპოზიციის ლიდერს აღკვეთის ღონისძიების სახით 30 000-ლარიანი გირაო შეუფარდა. პოლიტსაბჭოს თავმჯდომარეს დამატებითი შეზღუდვებიც აქვს დაწესებული, მელია საგამოძიებო ორგანოს ინფორმირებისა და თანხმობის გარეშე საცხოვრებელი ადგილის დატოვების უფლება არ აქვს, ასევე ეკრძალება საჯარო განცხადებების გაკეთება საზოგადოებრივი თავშეყრის ადგილას და მოწმეებთან ნებისმიერი სახის კომუნიკაცია. მას ასევე დაეკისრა საგამოძიებო ორგანოებისათვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება. 

ნიკა მელიას ბრალი სისხლის სამართლის კოდექსის 225-ე მუხლის პირველი და მეორე ნაწილებით აქვს წარდგენილი, რაც ჯგუფური მოქმედების ხელმძღვანელობას და ჯგუფურ მოქმედებაში მონაწილეობას გულისხმობს, რასაც თან ახლდა ძალადობა, რბევა, სხვისი ნივთის დაზიანება და განადგურება, იარაღის გამოყენებით ხელისუფლების წარმომადგენლისადმი წინააღმდეგობა და მათზე თავდასხმა.