20 ივნისის მოვლენებთან დაკავშირებით დაზარალებულად უფრო მეტი სამართალდამცავია ცნობილი, ვიდრე აქციის მონაწილე – ამ ინფორმაციას ახალგაზრდა იურუსტთა ასოციაცია ავრცელებს.

კერძოდ, აქციის ძალადობრივად დაშლიდან სამნახევარი თვის შემდეგ, დაზარალებულად ცნობილია 67 სამართალდამცავი და აქციის 4 მონაწილე.

20-21 ივნისის მოვლენებთან დაკავშირებული სისხლის სამართლის საქმეებზე ინფორმაცია საია-მ გენერალური პროკურატურისგან გამოითხოვა.

ამ ინფორმაციის თანახმად, შსს-ში გამოძიება მიმდინარეობს ორ საქმეზე, რომლის ფარგლებში აქციის 17 მონაწილეს წარედგინა ბრალი, ხოლო დაზარალებულად 67 სამართალდამცავია ცნობილი;

გენერალური პროკურატურის საგამოძიებო ნაწილში მიმდინარე გამოძიების ფარგლებში კი ბრალდება წარედგინა შინაგან საქმეთა სამინისტროს 3 თანამშრომელს, ხოლო შსს-ს თანამშრომელთა მხრიდან შესაძლო დანაშაულებრივ ქმედებასთან დაკავშირებით დაზარალებულად ცნობილია აქციის 4 მონაწილე.

ახალგაზრდა იურისტთა ასოციაციამ გენერალურ პროკურატურას 20 ივნისის ღამეს დაშავებული 16 ადამიანის დაზარალებულად ცნობის მოთხოვნით 19 სექტემბერს მიმართა. მაშინ პროკურატურაში თქვეს, რომ დანიშნულია სასამართლო-სამედიცინო ექსპერტიზები და “მტკიცებულების მოპოვებისა და სასამართლო-სამედიცინო დასკვნის საფუძველზე მიღებული იქნება გადაწყვეტილება აქციის მონაწილე პირების დაზარალებულად ცნობის თაობაზე”.

20 ივნისის ანტისაოკუპაციო აქცია ხელისუფლებამ რეზინის ტყვიებითა და ცრემლსადენი გაზით, მოგვიანებით კი წყლის ჭავლით ძალადობრივად დაარბია. დარბევის შედეგად დაშავდა 200-ზე მეტი ადამიანი, მათგან 160 სამოქალაქო პირი. 2-მა ადამიანმა რეზინის ტყვიებით თვალი დაკარგა.