სურსათის ეროვნული სააგენტოს ცნობით, აბაშის მუნიციპალიტეტში, ანჯელის მასივებში სიმინდის კარგი მოსავალი მოვიდა და ახლა მისი აღება აქტიურად მიმდინარეობს
მათი ინფორმაციით, აზიური ფაროსანას საწინააღმდეგო ღონისძიებების ფარგლებში, სურსათის ეროვნულმა სააგენტომ სიმინდის დიდი მასივები და მიმდებარე ტერიტორიები სპეციალიზებული ტექნიკის მეშვეობით, ცივი შესხურების ტექნოლოგიით დაამუშავა. გატარებული ღონისძიებების შედეგად მინიმუმამდე შემცირდა მავნებლის რაოდენობა, რამაც მოსავლის ხარისხი და რაოდენობა მნიშვნელოვნად გააუმჯობესა.
ფერმერებთან შეხვედრაზე სურსათის ეროვნული სააგენტოს უფროსმა ზურაბ ჩეკურაშვილმა აღნიშნა, რომ ფერმერებისა და სახელმწიფოს ერთობლივმა ბრძოლამ და კოორდინირებულად დაგეგმილმა ღონისძიებებმა შედეგი გამოიღო, რაც მოსავლის შედეგებზე დადებითად აისახა.
„მნიშვნელოვანია, რომ მოსახლეობა იღებს თხილისა და სიმინდის უხვ და ხარისხიან მოსავალს. ეს კი იმას ნიშნავს, რომ ადგილობრივი ფერმერი ზამთარს მომზადებული და ეკონომიკურად წელში გამართული, მომდევნო სეზონს კი წელს მიღებული ცოდნითა და გამოცდილებით შეხვდება,“ – აღნიშნა ზურაბ ჩეკურაშვილმა.