მარტვილის რაიონულ საავადმყოფოში ამ დროისთვის ნომერ მეორე საბავშვო ბაღიდან გადაყვანილი ორი არასრულწლოვანი რჩება. ექიმების განმარტებით, ორი ბავშვის საავადმყოფოში ამ დრომდე დატოვების მიზეზი ადრე გადატანილი ინფექციური დაავადება გახდა.
მარტვილის მეორე საბავშვო ბაღში ექსპერტ-კრიმინალისტები გუშინ მთელი დღე მუშაობდნენ. ასევე, მუშაობდნენ სურსათის ეროვნული სააგენტოს წარმომადგენლები, რომლებმაც ბათუმის ლაბორატორიაში გაგზავნეს სასმელი წყლისა და საკვები პროდუქტების ნიმუშები. ლაბორატორიული კვლევის შედეგები ორ-სამ დღეში გახდება ცნობილი.
გუშინ მარტვილის რაიონულ საავადმყოფოსა და კლინიკა „მკურნალში“ ინტოქსიკაციის ნიშნებით მარტვილის ნომერ მეორე საბავშვო ბაღიდან სამიდან ხუთ წლამდე ასაკის 19 ბავშვი გადაიყვანეს. შესაბამისი მკურნალობის შემდეგ სტაციონარში მხოლოდ ორი ბავშვი დარჩა.
მარტვილის მეორე საბავშვო ბაღში მომხდარ ფაქტთან დაკავშირებით გამოძიება სისხლის სამართლის კოდექსის 124-ე მუხლით მიმდინარეობს, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.