აშშ-ის მიერ რუსეთის მოქალაქეების წინააღმდე დამატებითი სანქციების დაწესება ქვეყანაში არსებულ საშინაო პოლიტიკურ კრიზისზე მეტყველებს, – ამის შესახებ ნათქვამია რუსეთის საგარეო საქმეთა სამინისტროს განცხადებაში, რომელიც უწყების ოფიციალურ ვებ-გვერდზეა გამოქვეყნებული.
”ჩვენ გვესმის, რომ ასეთი ნაბიჯები ასახავს საშინაო პოლიტიკის კრიზისს აშშ-ში, რომლის დროსაც ვაშინგტონის ისტაბლიშმენტი რუსეთს საკუთარი ოპორტუნისტული მიზნების მისაღწევად იყენებს”, – აღნიშნულია განცხადებაში.
რუსეთის საგარეო საქმეთა სამინისტრო „რუსოფობებს“ მოუწოდებს, გააცობიერონ, რომ მათი ქმედებები „ეწინააღმდეგება აშშ-ის ხელმძღვანელი პირების ოფიციალურ განცხადებებს ორმხრივი ურთიერთობების ნორმალიზების სურვილის შესახებ და ასევე იწვევს დაძაბულობა საერთაშორისო არენაზე.”
მოსკოვი აცხადებს, რომ დამატებითი სანქციების დაწესებას რუსეთი უპასუხოდ არ დატოვებს.
„ისევე როგორც წინათ, ანტი-რუსული ქმედება უპასუხოდ არდარჩება. ამერიკელ პოლიტიკოსებს მოვუწოდებთ, შეწყვიტონ სანქციებით უსარგებლო თამაში, რომლის შედეგებიც ნულია და საღ აზრს მოუხმონ,“ – ნათქვამია საგარეო საქმეთა სამინისტროს განცხადებაში.
აშშ-ის ფინანსთა სამინისტრომ 2016 წლის საპრეზიდენტო არჩევნებში ჩარევის საქმეზე რუსეთის 2 მოქალაქესა და 3 კომპანიას სანქციები დაუწესა. უწყების ცნობით, დენის კუზმინი და იგორ ნესტეროვი ბიზნესმენ ევგენი პრიგოჟინის „ინტერნეტ-გამოძიების სააგენტოსთან“ არიან დაკავშირებულები. აკრძალვები ასევე გავრცელდება ერთ გემსა და 3 თვითმფრინავზე, რომლებიც ამ კომპანიების საკუთრებაა.