ჩეხეთის პრეზიდენტმა მილოშ ზემანმა განაცხადა, რომ მას სურს გააუქმოს ჩეხეთის მიერ კოსოვოს, როგორც დამოუკიდებელი სახელმწიფოს აღიარება, – ამის შესახებ ინფორმაციას ”ევრონიუსი“ ავრცელებს.
მათივე ინფორმაციით, 74 წლის პრეზიდენტმა აღნიშნული განცხადება სერბეთში ვიზიტის დროს გააკეთა.
„მე დიქტატორი არ ვარ, მაგრამ რაც შემიძლია გავაკეთო დაახლოებით ერთი თვის განმავლობაში, არის ის, რომ ამ საკითხს კონსტიტუციური ორგანოების წარმომადგენლებთან განვიხილავ, სადაც დავსვამ კითხვას, არის თუ არა ეს შესაძლებელი,“ – განაცხადა მილოშ ზემანმა სერბეთის პრეზიდენტ ალექსანდრე ვუჩიჩთან შეხვედრის დროს.
მილოშ ზემანის თქმით, ის დარწმუნებულია, რომ ჩეხეთის თავდაცვის მინისტრი მის ინიციატივას მხარს დაუჭერს.
ჩეხეთის საინფორმაციო სააგენტოების ცნობით, აღნიშნული განცხადების საპასუხოდ კოსოვოს მთავრობამ პრაღაში დაგეგმილ “ვიშეგრადის ოთხეულისა” და დასავლეთ ბალკანეთის სამიტში მონაწილეობაზე უარი თქვა.
შეგახსენებთ, რომ კოსოვო ერთ დროს სერბეთის ტერიტორია იყო, ხოლო 2008 წელს მან თავი დამოუკიდებელ სახელმწიფოდ გამოაცხადა. სერბეთი, რუსეთი და ჩინეთი კოსოვოს დამოუკიდებლობას არ ცნობენ, თუმცა ასზე მეტი ქვეყანა, მათ შორის ევროკავშირის 23 წევრი სახელმწიფო კოსოვოს დამოუკიდებლობას აღიარებს.