ოკუპირებულ აფხაზეთში ე.წ. საპრეზიდენტო არჩევნების მეორე ტურში, შუადღის მონაცემებით, ამომრჩეველთა 19 პროცენტმა მიიღო მონაწილეობა, რაც პირველ ტურთან შედარებით, 0.27 მეასედი პროცენტით ნაკლებია. ამის შესახებ დე ფაქტო ცენტრალური საარჩევნო კომისიის თავმჯდომარემ, თამაზ გოგიამ 12:00 საათის მონაცემების შეფასებისას განაცხადა.

მისივე ცნობით, „არჩევნები“ დარღვევების გარეშე მიმდინარეობს.

ხმა უკვე მისცეს დე ფაქტო პრეზიდენტმა და პრეზიდენტობის კანდიდატმა რაულ ხაჯიმბამ და ალხას კვიწინიამ.

„მე ღმერთი არ ვარ, რომ წინასწარი პროგნოზი გავაკეთო, მაგრამ დარწმუნებული ვარ, რომ ხალხი სწორ არჩევანს გააკეთებს. მინდა მჯეროდეს, რომ ჯანსაღი აზრი გაიმარჯვებს“, – განაცხადა ხაჯიმბამ.

„პრეზიდენტობის“ მეორე კანდიდატმა ალხას კვიწინიამ ე.წ. საარჩევნო უბანზე მისვლისას აღმოაჩინა, რომ ხმას ვერ მისცემდა, რადგან პირადობის დამადასტურებელი მოწმობა თან არ აღმოაჩნდა და ვიდრე მოუტანდნენ, დალოდება მოუწია.