გუშინ გვიან ღამით, სასწრაფო სამედიცინო დახმარების ბრიგადამ თემქის N5 კლინიკურ საავადმყოფოში გართულებებით, კერძოდ მშობიარობის შემდგომი სისხლდენით შეიყვანა ახალნამშობიარები ქალი.
საავადმყოფოს პრესსამსახურის ინფორმაციით ახალშობილი თან არ ახლდა და ჩვილის ადგილსამყოფელი და მისი ჯანმრთელობის მდგომარეობა ამ დრომდეც უცნობია.
კლინიკაში აცხადებენ, რომ პაციენტს ჩაუტარდა ოპერაცია და ახლა რეანიმაციულ განყოფილებაში განაგრძობს მკურნალობას. მისი ჯანმრთელობის მდგომარეობა მძიმეა, თუმცა გართულებები მოსალოდნელი არ არის და მის სიცოცხლეს საფრთხე არ ემუქრება.
პრესსამსახურის განცხადებით, პაციენტს ოჯახის წევრი ან ახლობელი არც კლინიკაში მიყვანისას ახლდა და არც ამ დრომდე მისულა მასთან ვინმე.
შინაგან საქმეთა სამინისტროს ინფორმაციით, მომხდარზე გამოძიება სსკ-ის 112-ე მუხლით მიმდინარეობს, რაც გულისხმობს დედის მიერ ახალშობილის განზრახ მკვლელობას მშობიარობისას ან უმალვე მშობიარობის შემდეგ.