გავრცელებული ინფორმაციით, ორშაბათს, საქართველოს ახალი პრემიერ-მინისტრი ეყოლება. სამთავრობო ცვლილებებს უკავშირდება სწორედ, დღეს ქართული ოცნების ოფისში ჩანიშნული შეხვედრა, რომელსაც ბიძინა ივანიშვილი წარუძღვება. მმართველი გუნდი შეხვედრას 18:00 საათზე, უმრავლესობის ფორმატში გამართავს
უმრავლესობის დეპუტატები სწორედ დღეს დაგეგმილ შეხვედრაზე ელოდებიან დაზუსტებულ ინფორმაციას მთავრობაში მოსალოდნელ ცვლილებებზე. შესაბამისად, სავარაუდოდ, დღეს გაირკვევა, სექტემბერში მოქმედი პრემიერ-მინისტრი მივა პარლამენტში საქმიანობის ყოველწლიური ანგარიშით თუ პარლამენტის დღის წესრიგში ახალი შემადგენლობის მთავრობისათვის ნდობის გამოცხადების საკითხი დადგება.
კულუარული ინფორმაციით, მამუკა ბახტაძის ბედი გადაწყვეტილია და მას გიორგი გახარია შეცვლის, შს მინისტრის პოსტს კი ირაკლი ღარიბაშვილი დაიკავებს. მინისტრთა კაბინეტში ცვლილებების შესახებ განცხადება ოფიციალურად მომავალ კვირას გაკეთდება.
როგორც ცნობილია პრემიერ-მინისტრის გადადგომის შემდეგ გადამდგარად ითვლება მთავრობის სრული შემადგენლობა. კონსტიტუციისთანახმად, ახალ მთვარობას მომავალი პრემიერი დააკომპლექტებს, რომელსაც შემდეგ პარლამენტს წარუდგენს დასამტკიცებლად.