აქტივისტი მარიამ სიჭინავა სასაცილოს უწოდებს შემთხვევას, როცა მერიაში შეტანილი მისი განცხადება სწორედ იმ პირს დააწერეს, ვინც ის რამდენიმე დღის წინ სტენსილის „გახარია წადის“ გაკეთების გამო დააჯარიმა.
„განცხადება, რომელიც წინა კვირას დავტოვე მერიაში, სადაც ვწერდი, რომ მერიის თანამშრომლებმა, სხვა საჯარო მოხელეებთან ერთად 150-ე მუხლი დაარღვიეს ადმინისტრაციული კანონის, განსახილველად გადააწერეს იმ ადამიანს, ვინც ოქმი გამომიწერა და ვის დაჯარიმებასაც ვითხოვ. ანუ, პოტენციურმა დამნაშავემ უნდა გადაწყვიტოს დაარღვია თუ არა კანონი და ,თავი დაიჯარიმოს“, – წერს მარიამ სიჭინავა.
“გახარია წადი” სტენსილის დახატვისთვის დაჯარიმებულმა მარიამ სიჭინავამ ზუგდიდის მუნიციპალიტეტის მერიაში განცხადება 8 აგვისტოს შეიტანა. სიჭინავა ამბობს, რომ ზედამხედველობის სამსახურის თანამშრომლებმა ზუსტად ის მუხლი დაარღვიეს, რითაც მას აქვს ბრალი წაყენებული.
სიჭინავას ადმინიდსტრაციულ სამართალდარღვევათა კოდექსის 150-ე მუხლის მეორე ნაწილს ედავებიან, რაც ქალაქის იერსახის დამახინჯებას გულისხმობს და ითვალისწინებს 500 ლარიან ჯარიმას.