საქმე შესაძლოა, პოლიტიკურად მოტივირებული იყოს და მიზნად ისახავდეს ოპონენტებისა და კრიტიკული მედიის დევნას – ამ გზავნილით გამოეხმაურა 13 ქართული გავლენიანი არასამთავრობო ორგანიზაციის ნიკა გვარამიასთვის ბრალის წაყენებას. პროკურატურის ფორსირებული რეჟიმი არასამთავრობოებისთვის აჩენს განცდას, რომ პროცესი შესაძლოა, კავშირში იყოს ნიკა გვარამიას მიერ ახალი ტელევიზიის დაანონსებასთან და ახალი არხის კრიტიკულ სარედაქციო პოლიტიკასთან.

არასამთავრობო სექტორი მიიჩნევს, რომ ხელისულება წითელ ხაზებთან დგას, რომლის გადაკვეთის შემდეგაც საქართველო კიდევ უფრო მძიმე მდგომარეობაში აღმოჩნდება და პოლიტიკური რეპრესიების ტალღა ქვეყანის ევროპულ მომავალს დიდი დარტყმის წინაშე დააყენებს.

არასამთავრობოებს აინტერესებს, როდესაც უკვე შვიდი წელია, პროკურატურამ თაროზე შემოდო ჯარჯი აქიმიძის და დავით დვალის საჩივარი, არ დაასრულა „რუსთავი 2-ის“ დამფუძნებლების საქმის გამოძიება, როგორ მოახერხა პროკურატურამ რამდენიმე კვირაში “ინტერმედიას” და „რუსთავი 2-ის“ საქმიან კავშირზე ყველა მტკიცებულების გაანალიზება და ტელევიზიის გენდირექტორისთვის ბრალის წაყენება.

ხელისუფლების სურვილმა, ციხეში გაუშვას ქვეყნის ყველაზე კრიტიკული ტელევიზიის ყოფილი დირექტორი, დღეს არასამთავრობო სექტორი გააერთიანა. 13 გავლენიანი არასამთავრობო ორგანიზაცია მიმართავს საქართველოს პროკურატურას, რომ გაასაჯაროვონ მტკიცებულებები და გასცენ პასუხი ყველა იმ კითხვას, რომელიც ამ საქმის გარშემო არსებობს.

„პოლიტიკური ვენდეტა“ – გია ხუხაშვილი დარწმუნებულია, რომ სხვა მიზეზებთან ერთად ნიკა გვარამიას პირადად ბიძინა ივანიშვილი სჯის იმ კრიტიკული განცხადებების გამო, რომელიც “ქართული ოცნების” ლიდერის მისამართით გვარამიას არერთხელ გაუკეთებია.