პანკისის ხეობაში მცხოვრებ ახალგაზრდათა საინიციატივო ჯგუფი მალხაზ მაჩალიკაშვილის ძმისშვილის მორის მაჩალიკაშვილის დაკავებასთანდაკავშირებით განცხადებას ავრცელებს.
“მოგეხსენებათ რომ მორის მაჩალიკაშვილი არის სახელმწიფოს მიერ, საკუთარ საძინებელში მოკლული თემირლან მაჩალიკაშვილის ბიძაშვილი და უკვე ერთი წელია თემირლანის მამასთან ერთად ითხოვს სამართლიან გამოძიებას, დამნაშავეების დასჯას და თემირლანის უდანაშაულობის აღიარებას სახელმწიფოს მხრიდან. მიუხედავად იმისა რომ გაგვაჩნდა შინაგანი რწმენა მორისის უდანაშაულობისა დღემდე მოთმინებით ველოდით მის წინააღმდეგ ბრალის დასაბუთებას.
ადამიანის უფლებების სწავლებისა და მონიტორინგის ცენტრის მიერ გასაჯაროებულ დოკუმენტებში ცხადად ვხედავთ, რომ ამ ეტაპზე მორისის წინააღმდეგ არსებული ერთადერთი მტკიცებულება არის 20 ივნისის მოვლენების დროს გადაღებული ვიდეო, სადაც ჩანს, რომ ჰუსეინი მისი ბიძის გვერდში ყოფნას ცდილობს, ერთ ეპიზოდში ჭყლეტვაში მოყოლილი მორისი თავის დასაცავად ერთხელ მოიქნევს ხელს, რომელიც ხვდება პოლიციელის ფარს. ორგანიზაციის განცხადებით, ვიდეომასალაში არ ჩანს, რომ მორისი აქტიურად და მიზანდასახულად ცდილობს კორდონის გარღვევას, პოლიციის დაზიანებას და მით უფრო ძალადობის განხორციელებას. სწორედ ამ ფაქტის საფუძველზე შეეფარდა მორის მაჩალიკაშვილს წინასწარი პატიმრობა და ოთხიდან ექვს წლამდე თავისუფლების აღკვეთა ემუქრება.
ჩვენ პანკისელი ახალგაზრდები ვართ ის თაობა, რომელიც თანატოლია დამოუკიდებელი საქართველოსი და რომელნიც მოვდივართ პანკისის გარშემო მიმდინარე მძიმე პროცესების კვალდაკვალ. ჩვენ გავიზარდეთ მუდმივი დაძაბულობის, სტრესის, ბრალდებების , გაუცხოების და ტრაგედიების რეჟიმში და წილად გვხვდა ასევე მუდმივი თავის მართლების რეჟიმში ყოფნა იმ მოვლენების გამო, რაც ჩვენგან დამოუკიდებლად ჩვენს გარშემო ვითარდებოდა. ჩვენ ვხედავთ, რომ თითქმის ოცდაათი წელია პანკისი დაუსრულებელ და მოუგვარებელ პრობლემად არის მიწოდებული საზოგადოებისათვის. მთავარი გაკვეთილი კი, რაც ამ რთულმა პერიოდმა გვასწავლა არის ის, რომ პანკისის მოჯადოებული წრიდან გამოსავლის ერთადერთი საშუალება არის გამჭვირვალობა, ღიაობა და ობიექტური ინფორმაციის ხელმისაწვდომობა საზოგადოებისათვის. ჩვენ პანკისის ყველაზე მძიმე პერიოდშიც ვიყავით სრულიად კანონმორჩილი მოქალაქეები და დღესაც ვინარჩუნებთ ამ მდგომარეობას.
ხშირად, როცა პოლიტიკოსები მოდიან პანკისელებთან შესახვედრად, გვესაუბრებიან კულტურულ, ინფრასტრუქტურულ და სხვა სახის პროგრამებზე. თუმცა ყველა პანკისელის მთავარი მოთხოვნა უკავშირდება სამართლიანობას. ჩვენ ვითხოვდით სამართლებრივ დასაბუთებას თემირლანის ბრალეულობაზე და მისი მკვლელობის საქმეზე სამართლიანი მართლმსაჯულების განხორციელებას, ჩვენ ვითხოვდით სამართლიან კანონიერ პროცესს ჰესების საკითხზე და მივმართეთ სასამართლოს, ჩვენ ვითხოვდით ვახა მაჩალიკაშვილის პროტესტის მშვიდობიანობის უზრუნველყოფას, თუმცა ყოველ ჯერზე სახელმწიფოსგან პასუხი იყო ძალადობრივი. დღეს ჩვენ ვითხოვთ სამართლიან და მიუკერძოებელ სასამართლო პროცესს (ჰუსეინ) მორის მაჩალიკაშვილის საქმეზე! ჰუსეინის უკანონო დაკავება არის არა მხოლოდ ერთი ოჯახის წინააღმდეგ მიმართული ქმედება, არამედ ეს არის პანკისელი და სრულიად ქართველი ახალგაზრდობის თავისუფლების შეზღუდვა.
ჩვენთვის მიუღებელია, როცა ახალგაზრდა ბიჭი, რომელიც ამდენი ხანია მისი ოჯახის ღირსების და სამართლიანობის დაცვას ცდილობს, დაუსაბუთებლად პატიმრობაში აღმოჩნდა და შეიძლება უსამართლო მსჯავრდების მსხვერპლი აღმოჩნდეს. ჩვენ არ გვინდა სახელმწიფოს შეხებას ჩვენთან მხოლოდ საპოლიციო და რეპრესიული ძალით ვხედავდეთ და მუდმივად გვქონდეს უსამართლობის და დაუცველობის ღრმა განცდა. ჩვენი ხმა სახელმწიფოს თითქოს არ ესმის. სამწუხაროდ, ის უსამართლობის ამ ჯაჭვს არ წყვეტს. ჩვენ სოლიდარობას ვუცხადებთ ჰუსეინს, მის ოჯახს, მაჩალიკაშვილების გვარს ამ მძიმე მდგომარეობაში და ჩვენი ღირსებებისთვის, სამართლიანობისთვის და უფლებებისთვის კიდევ ერთხელ ვაცხადებთ: ჩვენ ვითხოვთ მშვიდობას, სამართლიანობას და ჩვენი ღირსების აღიარებას!“ – ნათქვამია განცხადებაში, რომელიც სოციალურ ქსელში გამოქვეყნდა.