წუხელ თბილისში, გურამიშვილის გამზირზე, ერთერთ საცხოვრებელ კორპუსში ორი ახალგაზრდის ცხედარი იპოვეს, უფრო ზუსტად, ერთ-ერთის მამამ იპოვა. ბიჭებს ცეცხლსასროლი იარაღიდან მიყენებული ჭრილობები აღენიშნებათ. ერთ ერთ მათგანს ტყვია შუბლში აქვს ნასროლი.

მოკლულები შალვა ტყემალაძე და გურამ კოღუა არიან. ოჯახის ახლობლების თქმით, ისინი უახლოესი მეგობრები იყვნენ.

20 წლის შაკო ტყემალაძე, “მისტერ ვალენტინი” 2014-ის თორნიკე ტყემალაძის ძმაა. 

გავრცელებული ინფორმაციით, მეზობლებს გასროლის ხმა არ გაუგიათ, ამიტომ არსებობს ვარაუდი, რომ მკვლელი მაყუჩიანი იარაღიდან ისროდა. 
“ნიუპოსტის” ინფორმაციით, მკვლელობაში ბრალდებული სათვალთვალო კამერამ დააფიქსირა. ამ წუთებში კი მისი იდენტიფიცირება მიმდინარეობს.

ამ ეტაპზე ადგილობრივები მომხდარის ორ ვერსიაზე საუბრობენ. ერთ-ერთის მიხედვით, ახალგაზრდები უცნობმა პირმა მაყუჩიანი იარაღით დახოცა და ტერიტორია კორპუსის უკანა ეზოდს გავლით დატოვა. შემთხვევის ადგილზე, საცხოვრებელი სახლიდან ლიფტის მიმართულებით, სისხლის კვალია.

მეორე ვერსიით კი, ბინაში მყოფი ორი ბიჭიდან იარაღი ერთ-ერთს გაუვარდა, მეგობრის გარდაცვალების შემდეგ კი ბიჭმა თავი მოიკლა. აღსანიშმავია, რომ სამართალდამცავებს მკვლელობის იარაღი შემთხვევის ადგილზე დახვდათ.

გამოძიება სისხლის სამართლის კოდექსის 109-ე მუხლით მიმდინარეობს, რაც დამამძიმებელ გარემოებაში განზრახ მკვლელობას გულისხმობს.შს სამინისტროში ამ ეტაპზე სხვა დეტალებზე არ საუბრობენ.