ოკუპირებულ აფხაზეთში, ახალ ათონში დე ფაქტო რესპუბლიკის ე.წ. უსაფრთხოების სამსახურმა დააკავა საქართველოს მოქალაქე, 1983 წელს დაბადებული ბეგლარ წილოსანი არასრულწლოვან ქალიშვილთან, თინათინ წილოსანთან ერთად . შემთხვევა გუშინ მოხდა.
სახელმწიფო უსაფრთხოების სამსახურის ცნობით , შინაგან საქმეთა სამინისტროსა და საქართველოში ევროკავშირის სადამკვირვებლო მისიის (EUMM) ჩართულობის შედეგად, თინათინ წილოსანი უკვე თავისუფალია და იმყოფება საკუთარ ოჯახში, საქართველოს ხელისუფლების მიერ კონტროლირებად ტერიტორიაზე. რაც შეეხება მამაკაცს, იგი აქამდე გალის იზოლატორშია მოთავსებული. ოკუპირებული აფხაზეთის ე.წ. უსაფრთხოების სამსახურის ვებ-გვერდზე გამოქვეყნებული ინფორმაციის თანახმად, წილოსანი ცდილობდა უკანონოდ გადაელახა დე ფაქტო აფხაზეთის რესპუბლიკის ე.წ. საზღვარი.
სუს- ში ცხადებენ, რომ ბეგლარ წილოსანის უკანონო პატიმრობიდან გასათავისუფლებლად მიმდინარეობს აქტიური მუშაობა, გააქტიურებულია ,,ცხელი ხაზი” და ინფორმირებულია საერთაშორისო ორგანიზაციები.