ლგბტ თემი მუქარას და დაანონსებულ ძალადობას პასუხობს. არსებული რისკის მიუხედავად, საქართველოში პირველი ღირსების მარში მაინც გაიმართება.
რამდენიმედღიანი მოლაპარაკების შემდეგ „თბილისი პრაიდის“ ორგანიზატორებმა მიიღეს გადაწყვეტილება, რომ გეგმებში ცვლილებები არ შეიტანონ.
დაპირისპირების თავიდან ასაცილებლად არ საჯაროვდება შეკრების ადგილი. ორგანიზატორების თქმით, იმ ფონზე, როდესაც ძალოვანი უწყებები, რომლებმაც წესრიგთან ერთად ყველა მოქალაქის გამოხატვის თავისუფლება და უსაფრთხოება უნდა დაიცვან, მარშის მონაწილეებს ამ უსაფრთხოების გარანტიებს ვერ აძლევენ.
ორგანიზაცია ”თბილისი პრაიდის” წარმომადგენელი, LGBTQ-აქტივისტი, მარიამ კვარაცხელია აცხადებს, რომ აქციაზე ძალიან ბევრი ადამიანი იქნება, მათ შორის სამოქალაქო საზოგადოების და დიპლომატიური კორპუსის წარმომადგენლებიც.
„განსაკუთებით ბოლო დღეების ფონზე, მიგვაჩნია, რომ ძალიან მნიშვნელოვანია გასვლა ქუჩაში და საზოგადოებრივი პროტესტი სახელმწიფოს იმ უმოქმედო პოლიტიკის მიმართ, რაც აქვთ ადამიანების უფლებების დარღვევის ფაქტების მიმართ. ვხედავთ, რომ ფაშისტური, ძალადობრივი ჯგუფები არიან გაძლიერებულები და ამავდროულად ვხედავთ, რომ სახელმწიფოს არანაირი კონკრეტული გეგმა პრევენციისთვის, ეფექტური პოლიტიკა ამ მიმართულებით არ გააჩნია.
„ეს საკითხები გასცდა უკვე ლესბოსელის, გეების, ბისექსუალი და ტრანსგენდერი ადამიანის უფლებებს, უფრო მასშტაბურ რაღაცებზე საუბრობთ, კითხვის ნიშნის ქვეშ დგება არსებული დემოკრატია, სახელმწიფოებრიობა. ამიტომ, ვფიქრობთ, რომ ძალიან ბევრი ადამიანი გამოვა ლგბტ თემის წევრებზე უფრო მეტი გამოვა მხარდამჭერები, გამოვლენ სამოქალაქო საზოგადოების წარმომადგენლები, საერთაშორისო საზოგადოების, ასევე, საელჩოები. ვიქნებით, ძირითადად, ის ადამიანები, ვისთვისაც ეს ყოველივე, რაც ჩვენს ქვეყანაში ახლა ხდება და რასაც ვუყურებთ არის მიუღებელი. შსს-მ როგორც ნახეთ, ოფიციალურ განცხადებაში განაცხადა, რომ იქნება რთული და გარკვეულწილად შეუძლებელი ასეთი ღონისძიების დაცვა, რადგან არის მაღალი რისკები, თუმცა, ჩვენ ვაანალიზებთ ამ რისკებს და თითოეულ ადამიანს, ვინც გამოვა მარშზე, ექნება სრული ინფორმაცია არსებული რისკების შესახებ და ინდივიდუალური პასუხისმგებლობის გათვალისწინებით გამოვა და გააპროტესტებს მიმდინარე მოვლენებს,“ – განაცხადა კვარაცხელიამ.
