პარლამენტმა ნუკრი ქანთარიასა და გენადი მარგველაშვილის საკანონმდებლო ინიციატივა ჩააგდო. კანონპროექტი “ზოგადი განათლების შესახებ” კანონიდან სიტყვის “ლიბერალური” ამოღებას ითვალისწინებდა. კანონპროექტს მხარი 61-მა დეპუტატმა დაუჭირა, ხოლო 18 – წინააღმდეგ წავიდა.   პარლამენტში ნუკრი ქანთარიას და გენადი მარგველაშვილის მიერ ინიცირებული კანონპროექტი 2019 წლის 20 თებერვალს დარეგისტრირდა.   დღევანდელ კენჭისყრას ხმაურიანი დებატები უძღვოდა წინ. ევროპული საქართველოს წევრებმა კენჭისყრის გადადება მოითხოვეს, ვიდრე პროექტი საბოლოო სახით არ დაზუსტდებოდა. ანალოგიური პოზიცია ჰქონდა უმრავლესობის წევრების ნაწილს. ნუკრი ქანთარიამ კენჭისყრის გადადება არ მოისურვა, ხმის მიცემის შედეგად კი, კანონპროექტი ჩავარდა.   [მიკროფონი] არ ირთვება, რა ჯანდაბა ვქნა მეტი. ასჯერ დავაჭირე ეს ღილაკი, ე.ი, ნერვები მომეშალა უკიდურესად. ახლა მე მივმართავ საქართველოს მოსახლეობას, ძალიან ცუდი რამ ხდება საქართველოს ე.წ. პარლამენტში დღეს. დღეს მართლა არ არის ეს საქართველოს პარლამენტი. კიდევ ერთხელ, მეათასეჯერ დავრწმუნდი ამაში, ეხლა აქ ხდება მანიპულირება ტერმინოლოგიის, მანიპულირება ხდება ეხლა და საშინელ ბავშვთა კოდექსს მიიღებს მალე საქართველო ამ პარლამენტის წყალობით, სადაც თავდაყირაა ყველაფერი დაყენებული – ჩვენი იდენტობა, ჩვენი ეროვნული ფასეულობები, ჩვენი ისტორია, ჩვენი გმირების თავდადებული ბრძოლა, ყველაფერი არის თავდაყირა დაყენებული და ბავშვების გადაგვარების გზაზე გინდათ, თქვენ, რომ დააყენოთ ქვეყანა. არ გამოგივათ ეს.   აბა, რა პრეტენზია გაქვთ ერთი, გამოჩენილო ლიბერალებო, მითხარით, რა გამრუდებული აზროვნების დეპუტატები ჰყავს ქვეყანას, რა გჭირთ ხალხო, რა დაგემართათ, რა ფეტიშიზმია აქ გაბატონებული ევროპის მიმართ. ფეტიშიზმით უნდა ვიცხოვროთ და ვიმოღვაწეოთ ჩვენ თუ საღი აზროვნებით და ჩვენი ეროვნული ტრადიციებიდან და ჩვენი ისტორიიდან გამომდინარე ”