"თავისუფლება ბესიკ დგებუაძეს", ,,პოლიცია იცავს კრიმინალს", ,,ვითხოვთ სამართლიანობას"- ამ ტრანსპარანტებით ბესიკ დგებუაძის ოჯახის წევრები და ახლობლები აქციას მართავენ პროკურატურასთან.  აქციის მონაწილეები 13 აპრილს ქუთაისის სააპელაციო სასამართლოს მიერ გამოტანილ განაჩენს აპროტესტებენ და დგებუაძის გათავისუფლებას ითხოვენ. საქმე ეხება 2018 წლის 26 ნოემბერს მომხდარ ინციდენტს, რომლის დროსაც დგებუაძე ცეცხლსასროლი იარაღით დაჭრეს. მას გამოძიება ცრუ ჩვენების მიცემას და ჯანმრთელობის მსუბუქად დაზიანებას ედავება. აქციის მონაწილეებმა გზის გადაკეტვა რამდენჯერმე სცადეს, ისინი ფეხით მსვლელობას აწყობდნენ სამხარეო პოლიციისკენ, თუმცა ისევ პროკურატურასთან გადმოინაცვლეს. ამ წუთებში ბესიკ დგებუაძის მამა პროკურორ ლევან სალიას ხვდება. აქციის მონაწილეები შეხვედრის დასრულებას ელოდებიან.