რუსულ სამხედრო ბაზაზე, გაურკვეველ ვითარებაში გარდაცვლილი 29 წლის ირაკლი კვარაცხელიას ლექსის ნაწყვეტის წარწერით ზუგდიდში სტენსილი გამოჩნდა.ლექსის ბოლოში არის მინაწერი ,,არ შეეგუო ოკუპაციას.,, სტენსილი დადიანების სასახლის ეზოს გარეთა პერიმეტრზე, თვალშისაცემ ადგილასაა განთავსებული. თვითმხილველთა ინფორმაციით, ცხედარს ფიზიკური დაზიანების კვალი აღენიშნებოდა, რაც ოკუპანტების მხრიდან, მასზე ძალადობის ფაქტზე მიუთითებს. ირაკლი კვარაცხელია, ოკუპანტებმა სოფელ თაგილონისა და ნაბაკევის საოკუპაციო საზღვართან დააკავეს და რუსულ სამხედრო ბაზაზე გადაიყვანეს. საოკუპაციო რეჟიმის წარმომადგენლები, თვითმკვლელობის ვერსიას ავრცელებენ, თუმცა ამ ვერსიის ოჯახს არ სჯერა.