ზუგდიდში 10 უკრაინელი ბავშვის მოწამვლის დეტალები

0
421
ზუგდიდის რეფერალურ ჰოსპიტალში კვებითი ინტოქსიკაციის ნიშნებით 10 ბავშვი შეიყვანეს, მათ შორის ერთი შვიდი თვის გოგონაა.
 
ბავშვები ზუგდიდში, ერთ-ერთ საცხოვრებელ კორპუსში ქალთან ერთად ცხოვრობდნენ. არსებული ინფორმაციით, ისინი უკრაინის მოქალაქეები არიან და აღნიშნულ ბინაში ქირით ცხოვრობდნენ.
 
„წუხელ სასწრაფო დახმარების ბრიგადამ ათი არასრულწლოვანი პაციენტი შემოიყვანა, რომელთაც აღენიშნებოდათ გულისრევის შეგრძნება, ღებინება, ზოგადი სისუსტე. სავარაუდოდ, დიაგნოზი არის დაუზუსტებელი საკვებისმიერი ინტოქსიკაცია. პაციენტებს გაეწიათ შესაბამისი დახმარება და კვლევები“, – განაცხადა კლინიკის პედიატრმა მზია გერგედავამ.
 
მისივე ინფორმაციით, ბავშვები სხვადასხვა ასაკის არიან, მათ შორის ყველაზე უმცროსი 7 თვის, ხოლო უფროსი 11 წლისაა.
 
დღეს მათ სპეციალიზირებულ კლინიკაში, კერძოდ, ქუთაისის ინფექციურ საავადმყოფოში გადაიყვანენ.
 
უკრაინის მოქალაქე იულია სუსლიაკი ამტკიცებს, რომ ბავშვები მისი შვილები არიან და ამბობს, რომ აქვს დოკუმენტი, სადაც დაფიქსირებულია არასრულწლოვანი შვილის საზღვარგარეთ გაყვანის თანხმობა. მან ჟურნალისტების სხვა კითხვებს პასუხი არ გასცა.
 ქალის მეზობლების ინფორმაციით, მას ბავშვები მინდობითი აღზრდის პროგრამით ჰყავდა აყვანილი.
 
მათი თქმით, ბავშვები მთელი დღის განმავლობაში ტიროდნენ, რის შემდეგაც მათ სასწრაფო სამედიცინო დახმარების ბრიგადა და საპატრულო პოლიცია გამოიძახეს. 
 

სამართალდამცავები ბავშვების დედას თუ მეურვეს კითხავენ.  ჯერჯერობით უცნობია, რა მიზნით იმყოფებიან ისინი საქართველოში

წინა სტატიაშინაგან საქმეთა სამინისტრომ „ლიბერთი ბანკის“ დაყაჩაღების ფაქტზე სამი პირი დააკავა
შემდეგი სტატიასაოკუპაციო ძალების წარმომადგენლებმა მეჯვრისხევის მკვიდრი, 50 წლამდე ასაკის მამაკაცი გაიტაცეს
ტელეკომპანია ოდიშის საინფორმაციო სამსახური