სისხლიანი გარჩევა "ქართული ოცნების" შტაბში – შს მინისტრის მოადგილის ინფორმაციით, დამნაშავე იდენტიფიცირებულია სოფელ გრიგოლიშში 28 წლის ახალგაზრდა მამაკაცის დაჭრის ფაქტს, შს მინისტრის მოადგილე ეხმაურება.
ნათია მეზვრიშვილის განცხადებით, დანაშაულის ჩამდენი პირი იდენტიფიცირებულია და მიმდინარეობს სამძებრო ღონისძიებები.
„ამ საკითხზე გამოძიება მიმდინარეობს. უკვე დადგენილი გვყავს პირი, რომელმაც სავარაუდოდ დანაშაული ჩაიდინა. ვიმედოვნებ, რომ უახლოეს საათებში და უახლოეს დღეებში მოხდება ამ პირის დაკავება და პასუხისმგებლობის საკითხის დაყენება. არა აქვს არანაირი მნიშვნელობა, მე არ ვიცი ამ ადამიანის პოლიტიკური შეხედულებები. ბუნებრივია, როდესაც გამოცხადდება ან დავაკავებთ მოხდება შესაბამისი კითხვების დასმა და გავერკვევით მერე სიტუაციაში დეტალურად. არ აქვს არანაირი მნიშვნელობა არც მის პოლიტიკურ კუთვნილებას და არც მის შეხედულებებს, ეს იქნება „ქართული ოცნების“ მხარდამჭერი, „ნაციონალური მოძრაობის“ მხარდამჭერი, „ევროპული საქართველოს“ მხარდამჭერი თუ სხვა პოლიტიკური პარტიის მხარდამჭერი, პასუხისმგებლობის საკითხი დადგება ყველა იმ პირის ვინც დანაშაულს ჩაიდენს,“-განაცხადა ნათია მეზვრიშვილმა.
სისხლიანი გარჩევა „ქართული ოცნების“ აქტივისტებს შორის სოფელ გრიგოლიშში, მმართველი პარტიის შტაბში, გვიან ღამით მოხდა.
„ქართული ოცნების“ წევრებს შორის, ჯერ სიტყვიერი შელაპარაკება დაიწყო, მოგვიანებით კი დაპირისპირებას გასროლა მოყვა. ადგილობრივი მოსახლეობა ამტკიცებს, რომ ალიკა ლაგვილავას თანასოფლელმა, ბეჟან გვაზავამ ესროლა. კონფლიქტს წინ შელაპარაკება უძღოდა, რაც სავარაუდოდ არჩევნებს უკავშირდება.
შემთხვევის თვითმხილველი ამბობს, რომ შტაბიდან გასვლის შემდეგ სროლა გარეთ გაგრძელდა, პირველი გასროლა კი შტაბში მოხდა. .