ზუგდიდში, "ნაციონალური მოძრაობის" წევრების დაკავებაში, ზუგდიდის პოლიციის უფროსი პირადად მონაწილეობდა. კადრებში ჩანს, თუ როგორ აკავებს უშუალოდ ირაკლი ფაცაცია ოპოზიციის წევრებს.
ენმ-ს პოლიტიკური საბჭოს წევრი გიორგი პატარაია კი ხელწერილის საფუძველზე გვიან ღამით გაათავისუფლეს. მისი განცხადებით, სამართალდამცველები უსაფრთხოების დაცვის ნაცვლად, პოლიტიკური დევნით არიან დაკავებულები.
"მივდიოდით პოლიტიკურ ღონისძიებაზე. თვალთვალი იყო განხორციელებული მანქანის მიერ. არ ვიცოდით ჩვენ ვისი მანქანა იყო. მოვთხოვეთ ამ მანქანაში მსხდომ ადამიანებს საბუთი, არ გვაჩვენეს. გამოვიძახეთ პოლიცია და პოლიციის მოსვლის შემდეგ მათ აჩვენეს ჩვენს წარმომადგენლებს საბუთი.
სამწუხაროა, რომ დღევანდელი ხელისუფლება პოლიციას, იმ ადამიანებს ვინც უნდა ემსახურებოდნენ ქვეყანას, დავალებას აძლევენ სხვა მიმართულებით, რომ დევნა იყოს პოლიტიკური მიმართულებით, დევნა იყოს იმ კანდიდატის მიმართ, რომელიც იგებს დღეს ზუგდიდში,"-განაცხადა გიორგი პატარაიამ.
ზუგდიდის საკრებულოს წევრმა ანი წითლიძემ კი პოლიციის განყოფილება მოგვიანებით დატოვა, თუმცა ამ დრომდე დაკავებულია მანუჩარ ჩხეტია. წინასწარი დაკავების იზოლატორში მის გადაყვანას ხმაური მოყვა, რა დროსაც ჩხეტიას დედა შეუძლოდ გახდა.
"ეს დაკავება არის წმინდა სახის პოლიტიკური დაკავება, ამას არანაირი კავშირი არ აქვს ამ ადამიანის მიერ ჩადენილ დანაშაულთან და ჩვენ ვიბრძოლებთ, რომ ჩვენმა თანამებრძოლმა სწრაფად დატოვოს იზოლატორი,"-აცხადებს ენმ-ს აღმასრულებელი მდივანი კობა ნაყოფია.
შსს "ნაციონალური მოძრაობის" წევრებს ხულიგნობასა და პოლიციელების კანონიერი მოთხოვნისადმი დაუმორჩილებლობას ედავება.