პარლამენტის თავმჯდომარის, ირაკლი კობახიძის განცხადებით, ,,ქართულ ოცნებაში'' სიის განახლებაზე მუშაობა მომავალი წლის ზაფხულამდე არ დაიწყება"
,,განახლება სჭირდება ყველა პარტიას და ჩვენც განახლებული გუნდით შევხვდებით ყველა შემდეგ არჩევნებს.ახალი კადრების მოძიების პროცესში მთელი პოლიტსაბჭოა ჩართული და მათ შორის ირაკლი ღარიბაშვილიც, რომელიც პოლიტსაბჭოს წევრთან ერთად პარტიის პოლიტიკური მდივანიც არის. ჯერ ახლა დაიწყო განახლება და რა მასშტაბით განხორციელდება, ეს ჯერ არ ვიცით. ზოგადად შეიძლება თქმა, რომ დღეს გუნდის თითოეული წევრი არის ღირებული, ამასთან ერთად განახლებაც მნიშვნელოვანია, რამდენად მასშტაბური იქნება ამას გვიჩვენებს ანალიზი, რომელიც განხორციელდება – განაცხადა ირაკლი კობახიძემ.
რაც შეეხება უშუალოდ სიის პირველ ნომრებს, კობახიძის თქმით, ამაზე მსჯელობა არ დაწყებულა. მისივე თქმით, იქნება თუ არა ირაკლი ღარიბაშვილი „ქართული ოცნების“ საარჩევნო სიაში, ეს თავად ღარიბაშვილზეა დამოკიდებული.
„იქნება თუ არა პირველ ათეულში, ეს თვითონ ირაკლიზეც არის დამოკიდებული, როგორი ხედვა აქვს პოლიტიკაში, როგორ, რა მიმართულებით ესახება თავისი პოლიტიკური მომავალი. ამაზე მსჯელობისთვის საკმარისი დრო გვაქვს შემდეგი წელიწადნახევარი და რა თქმა უნდა, ირაკლისთან კონსულტაციების საფუძველზე ყველაფერზე შევჯერდებით", -განაცხადა კობახიძემ.