სამხედრო მფრინავი ეკატერინე ქვლივიძე პარლამენტში მინისტრის საათის ფარგლებში გამართულ შეხვედრაზე არ შეუშვეს.
„ევროპული საქართველოს“ ერთ-ერთმა ლიდერმა ელენე ხოშტარიამ თავდაცვის მინისტრი დისკრიმინაციაში დაადანაშაულა. ხოშტარიას თქმით სამხედრო მფრინავს ჯერ თავდაცვის სამინისტროს, ახლა კი პარლამენტის კარიც მიუხურეს, რომ თავდაცვის უწყების ხელმძღვანელს მისი მწვავე კითხვებისთვის პასუხის გაცემა არ დაჭირვებოდა. გავრცელებული ინფორმაციით პარლამენტში მისული ეკატერინე ქვლივიძე სასესიო დარბაზში პარლამენტის თავმჯდომარის გადაწყვეტილებით არ შეუშვეს:
"ამ შენობაში ახლა იმყოფება ეკა ქვლივიძე, რომელიც ყველა ქვეყნისთვის უნდა იყოს საამაყო სიმბოლო თანამედროვე ნატო-ს სტანდარტების ღირსეული შეიარაღებული ძალებისთვის. ყველა რომ ფეხზე უნდა ვიდგეთ და ტაშს ვუკრავდეთ ისეთი ადამიანია. ეს ადამიანი ახლა დგას პარლამენტის მიერ მიჯახუნებული კარის მიღმა. არათუ თავდაცვის სამინსიტროს კარი მიუჯახუნეთ, პარლამენტის კარიც მიუჯახუნეთ, რომ ვაი და არ ესიამოვნოს ჩვენს თავდაცვის მინისტრს, რომ მისი სახე დაინახოს, უბრალოდ რომ მოუსმინოს. ამ შემთხვევაში, გარდა იმისა, რომ წარმოუდგენელია, რომ ასეთი ადამიანებით არ ვამაყობთ. ამ მაგალითზე მინდა იმ სადღეგრძელოს მიღმა, რომელიც მოვისმინეთ რამდენიმე მთავარი პრობლემა გამოვავლინოთ: ეს არის ჯარის დისკრედიტაცია, ვის მოზიდვაზე ლაპარაკობთ, როდესაც ასეთ ადამიანს წიხლს ჰკრავთ და შეურაცხყოფთ. ამბობთ, რომ მილიონები უნდა დახარჯოთ შვეულმფრენების მოდერნიზებაში, აგერ გყავთ მფრინავი და გარდა იმისა, რომ გადინებაა, როგორ აპირებთ, ათეულობით ადამიანი უნდა,რომ ამ მოდერნიზებას მოემსახუროს. ვის ატყუებთ? სად ხარჯავთ ამ მილიონებს ადამიანებს თუ კარგავთ, ვინც შვეულმფრენები უნდა ატაროს. მას უფროსმა უთხრა, ქალებისთვის რესურსის ხარჯვას არ ვაპირებთო. კიდევ ერთი სისტემური პრობლემა. ამერიკელმა პარტნიორებმა, რომლებზეც დგას ქართული შეირაღებული ძალები, ამ ადამიანში ფული რომ ჩადეს და ათასობით დახარჯეს, რომ მერე ვიღაცა უზნეო ადამიანმა უთხრა, რომ ქალებისთვის დრო არ მყოფნის და მფრინავის გეგმაში ვერ ჩაგსვამთო და გორში ქვეითებში რომ გადააგდეს მფრინავი ადამიანი.“ – განაცხადა ელენე ხოშტარიამ.