ზუგდიდის მე-6 საჯარო სკოლის გარდაცვლილი დირექტორის ია კერზაიას შვილს ბაჩანა შენგელიას გენერალურმა პროკურატურამ დაზარალებულის უფლებამონაცვლედ ცნობაზე უარი უთხრა. ინფორმაცია ამის შესახებ ბაჩანა შენგელიამ სოციალურ ქსელში გამოაქვეყნა. შენგელია პროკურატურის გადაწყვეტილებას სამართლებრივ აბსურდს უწოდებს. 

"გენერალურმა პროკურატურამ უარი მითხრა იას საქმეზე დაზარალებულის უფლებამონაცვლედ ცნობაზე, არადა სისხლის სამართლის საპროცესო კოდექსის 56.3-ე მუხლის თანახმად ,,იმ დანაშაულის საქმეში, რომელსაც დაზარალებულის სიკვდილი მოჰყვა, დაზარალებულის უფლებები ენიჭება და მისი მოვალეობები ეკისრება მის რომელიმე ახლო ნათესავს („დაზარალებულის უფლებამონაცვლე“)''.

უარის მთავარ არგუმენტად მოყვანილი აქვთ გარემოება, რომ 13 მარტს (აქამდე რას აკეთებდნენ?) გარდაცვალების მიზეზის დასადგენად საქმის მასალები აქვთ სამხარაულში ექსპერტიზაზე გადაგზავნილი. გარდაცვალების მიზეზები ცნობილია და ორასგვერდიანი სამედიცინო ბარათიც წარმოგიდგინეთ, რომელიც გარდაცვალებიდან რამდენიმე დღეში ავიღე საავადმყოფოდან.დაზარალებულის უფლებამონაცვლეობა ნიშნავს, რომ მე მექნებოდა საქმის გაცნობის უფლება და სხვა საპროცესო უფლებამოვალეობები, რაც როგორც ჩანს, არ აწყობთ.

ჩქარი ნაბიჯებით მიდიხართ სისტემური დანაშაულისკენ, ყოჩაღ!"- წერს ბაჩანა შენგელია