ბიზნესმენი მანანა მიქავა ზუგდიდის მერის მოვალეობის შემსრულებელს  მაიზერ ნანავას მის წინააღმდეგ განხორციელებულ უკანონო ქმედებაში ადანაშაულებს. ამის შესახებ მან დღეს მერიასთან გამართულ საპროტესო აქციაზე განაცხადა. მიქავას თქმით, გულუას პარკის ტერიტორიაზე მიწის შეძენის დროს განსაზღვრული ვალდებულებების გამო სასამართლომ მას 3 მილიონ 700 ათასი ლარი ჯარიმის გადახდა დააკისრა. ასეთ შემთხვევას ბიზნესმენის თქმით, ადგილი ქონდა ყოფილი მერის ირაკლი გოგოხიას მერობის პერიოდშიც.მანანა მიქავას თქმით, პროკურატურაში მერიის სახელზე განცხადება ისევ შეიტანეს, რომელსაც ხელს მერის მოვალეობის შემსრულებელი მაიზერ ნანავა აწერს. აქციაზე მივიდა „სამეგრელოს ხმის“ ლიდერი თენგიზ ჯგუშიაც. ხელშეკრულების მიხედვით მანანა მიქავას 2008 წელს შეძენილ ტერიტორიაზე აკვაპარკი 2012 წლამდე უნდა აეშენებინა 6 მილიონიანი ინვესტიციით. მიქავა თაღლითობის მუხლით იყო დაკავებული და საპატიმროში 3 წელი გაატარა,  გამგეობას მიწის ნაკვეთზე ნასყიდობის ხელშეკრულება კი  ბათილად ქონდა ცნობილი. ბათილობის სასამართლო დავა მიქავამ მერიას მოუგო.ხოლო მას შემდეგ, რაც ზუგდიდი 2 მუნიციპალიტეტად დაიყო, მისი კუთვნილი მიწა ქალაქის საკუთრებაში დარჩა. მისი თქმით, რამდენჯერმე მიმართა გამგეობას და საკრებულოს ახალი ინდივიდუალური აქტის გამოცემის თაობაზე. მერიიდან მიღებული პასუხის თანახმად, თუ 60 დღეში 4 მილიონიან ინვესტიციას არ განახორციელებდა, ნაკვეთი ჩამოერთმეოდა. არასაკმარისი ვადის გამო მას მიწის ნაკვეთი კვლავ ჩამოერთვა და  ადგილობრივმა თვითმმართველობამ დაიბრუნა. დავა იმ ნაკვეთზე მიმდინარეობს, რისთვისაც სახელმწიფო უსაფრთხოების სამსახურის ცნობით, ზუგდიდის ყოფილმა მერმა ლაშა გოგიამ და ვიცე მერმა გია გულორდავამ ქრთამი აიღეს.