მორალური შეტევის ახალი რაუნდი ეკა ბესელიას წინააღმდეგ – დეპუტატის პირადი ცხოვრების ამსახველი კადრები ისევ ინტერნეტსივრცეში გავრცელდა.
გაზეთ „ქრონიკა პლუსის“ მთავარმა რედაქტორმა ფარული კადრების შესახებ ინფორმაცია Facebook-ზე მიიღო. როგორც ელისო კილაძე ამბობს, მან ერთ-ერთმა მომხმარებელმა დაუწერა კომენტარი, რომ ბესელიას კადრები ისევ გავრცელდა და სთხოვდა, რომ რეაგირება მოეხდინა. კილაძის თქმით, Youtube-ზე მართლაც აღმოჩნდა ფარული კადრები.
ელისო კილაძის თქმით, გუშინვე დარეკა 112-ში, ოქმი შეადგინეს და დღეს გამოკითხვაზე დაიბარეს.
ის საგამოძიებო უწყებაში ცოტა ხნის წინ გამოცხადდა. შინაგან საქმეთა სამინისტროში ჟურნალისტის გამოკითხვა მიმდინარეობს.
„კურიერის“ ინფორმაციით, ბმული, რომელიც იუთუბზე იყო გავრცელებული, ორი კვირის განმავლობაში იდო ინტერნეტსივრცეში, თუმცა გამოძიებამ ელისო კილაძის მიმართვის შემდეგ მოახდინა რეაგირება.
„ერთ-ერთმა მომხმარებელმა, რომელიც ჩემთვის არის უცნობი, არც მეგობრებში მყავს, Facebook-ის სტატუსზე დაწერა შეტყობინება, რომ ვიდეოპორტალ Youtube-ზე ეკა ბესელიას პირადი ცხოვრების ამსახველი ფირი ვრცელდება ხელახლა და მომიწოდა მე, რომ მივმართო შესაბამის ორგანოებს, რომ ეს ფირი დაბლოკონ,“ – განაცხადა ელისო კილაძემ