სასტუმრო "რედისონში", ოპოზიციურ პოლიტიკურ ორგანიზაციათა გაერთიანება "მილიონი ხელმოწერის" წარმომადგენელთა და არასამთავრობო ორგანიზაციების შეხვედრა მიმდინარეობს.
შეგახსენებთ, როპ 20 ოპოზიციური პარტია საარჩევნო სისტემის შეცვლის მოთხოვნით ხელმოწერებს აგროვებს, რათა კონსტიტუციაში შევიდეს ცვლილება და საქართველლოში მომავალი საპარლამენტო არჩევნები პროპორციული სისტემით გაიმართოს. მიუხედავად იმისა, რომ კანონის თანახმად კონკრეტული ინიციატივის წარსადგენად 200 ათასი ხელმოწერა საკმარისია, ოპოზიცია მზადაა მილიონი ადამიანის ხელმოწერა დააფიქსიროს.ოპოზიციური პარტიების გაერთიანება – "მილიონი ხელმოწერა სამართლიანი არჩევნებისთვისა" და არასამთავრობო ორგანიზაციების შეხვედრას „ახალი მემარჯვენეების“ ერთ-ერთი ლიდერი მამუკა კაციტაძე ესწრება.
როგორც კაციტაძემ განაცხადა, მაისის ბოლოს მოსახლეობის ხელმოწერების საჭირო რაოდენობა მზად იქნება პარლამენტში შესატანად.
„როგორც მოგეხსენებათ, მიმდინარეობს ხელმოწერების შეგროვება საკონსტიტუციო ცვლილების განსახორციელებლად, რომლის მიზანია საარჩევნო სისტემაში სამართლიანობის აღდგენა, რაც მაჟორიტარული სისტემის გაუქმებით გამოიხატება. მესამე კვირაა, ხელმოწერების შეგროვების პროცესი გაშლილია ყველა მუნიციპალიტეტში. ჩვენი მიზანია, მთელი ამ კამპანიის განმავლობაში მილიონი მოქალაქის ხმა გავაგონოთ დაყრუებულ ხელისუფლებას, რომ ეს მათი ნებაა და არა – ცალკეული ოპოზიციის, რომ გაუქმდეს მაჟორიტარული სისტემა. რაც შეეხება სამართლებრივ ნაწილს, ჩვენ ამ პროცესს არ გავწელავთ და დაახლოებით 20 მაისის ბოლოსთვის ხელმოწერების საჭირო რაოდენობას სამართლებრივი პროცესის დასაწყებად შევიტანთ პარლამენტში. თუმცა, ხელმოწერების შეგროვების კამპანიური ნაწილი კვლავ გაგრძელდება. ამაში პრობლემას ვერ ვხედავ, მთავარი პრობლემა პარლამენტშია, როცა ეს პროცესი დამთავრდება თავისი საჯარო განხილვიანად, მერე როგორ უპასუხებს საკუთარ ამომრჩეველს, მოქალაქეებს ქართული ოცნების ხელისუფლება. მათ ნებას როგორ გაითვალისწინებს.