თბილისში, ვარკეთილში, სამარშრუტო ტაქსის მძღოლი დაჭრეს. შემთხვევა სუხიშვილის ქუჩაზე, ტაქსების ბოლო გაჩერებაზე მოხდა.
დაჭრის ფაქტს წინ უძღოდა მამაკაცებს შორის შელაპარაკება, თუმცა დაპირისპირების მოტივი ამ დრომდე უცნობია.
დაჭრილი, 50-წლამდე ასაკის მამაკაცი საავადმყოფოშია გადაყვანილი. ექიმების ცნობით, დაშავებულის მდგომარეობა სტაბილურია. მას ჭრილობა გულ-მკერდის არეში, ცივი იარაღით აქვს მიყენებული.
შინაგან საქმეთა სამინისტროს ინფორმაციით, დაჭრაში ეჭვმიტანილი დაკავებულია.დანაშაული ცხელ კვალზე გაიხსნა.
"შინაგან საქმეთა სამინისტროს თბილისის პოლიციის დეპარტამენტის ისანი-სამგორის სამმართველოს თანამშრომლებმა, ჩატარებული ოპერატიული და საგამოძიებო მოქმედბების შედეგად, 1975 წელს დაბადებული ი.ჩ. ჯანმრთელობის განზრახ მსუბუქი დაზიანების ბრალდებით თბილისში დააკავეს.
გამოძიებით დადგინდა რომ, ბრალდებულმა ურთიერთშელაპარაკებისას 1958 წელს დაბადებულ ბ.ლ.-ს ცივი იარაღით მუცლის არეში ერთი ჭრილობა მიაყენა. პოლიციამ ბრალდებული შემთხვევის ადგილზე დააკავა.
გამოძიება საქართველოს სისხლის სამართლის კოდექსის 120-ე მუხლით მიმდინარეობს, რაც ჯანმრთელობის განზრახ მსუბუქ დაზიანებას გულისხმობს" – აღნიშნულია შსს-ს მიერ გავრცელებულ ინფორმაციაში.