ოკუპირებულ აფხაზეთში დაღუპული ირაკლი კვარაცხელიას ცხედრის ექსპერტიზის საკითხებს მიეძღვნა პრესკონფერენცია, რომელზედაც ქართველმა ექსპერტებმა ამ დროისათვისარსებული მონაცემების სესახებ ისაუბრეს.
,,ირაკლი კვარაცხელიას კისრის არეში აღენიშნებოდა სტრანგულაციური ღარი. ეს დამახასითებელია თოკის, რაიმე მავთულის ან სხვა მსგავსი საგნისთვის, რომელიც კვალს ტოვებს სტრანგულაციური ღარის სახით კისრის მიდამოებზე,- განაცხადა ექსპერტმა ირაკლი თოიძემ
მისი თქმით, საგამოძიებო ორგანოებმა უნდა უპასუხონ კითხვას, თვითმკველობის თუ მკვლელობის შედეგადაა მიყენებული დაზიანებები, რაც კვარაცხელიას სხეულზე აღენიშნება და ამაზე წინასწარ, ვარაუდის დონეზე დასკვნები ვერ გაკეთდება, ვინაიდან ექსპერტიზა მხოლოდ დაზიანებებს აღწერს.
მისი განმარტებით, მას შემდეგ, რაც ექსპერტიზა საბოლოო ლაბორატორიულ დასკვნებს მიიღებს, საერთო ანალიზით შესაბამის შედეგს/დასკვნას დადებენ. საბოლოო დასკვნის გაკეთებას კი ექსპერტიზა მხოლოდ ერთი თვის ვადაში შეძლებს.
ექსპერტის განმარტებით, გარდაცვლილის სხეულზე ელექტროშოკის კვალი არ შეუმჩნევია.
„რაც შეეხება დაზიანებებს, გვამი ჩვენთან როცა შემოვიდა, გაკვეთილი იყო. პირველადი ექსპერტიზა ალბათ, სოხუმში იყო ჩატარებული, საიდანაც გადმოასვენეს. ჩვენთან ექსპერტიზა ხელმეორედ ჩაუტარდა. დაზიანებებს რაც შეეხება, სხვა, მცირე ზომის დაზიანება კისრის არეში მარცხნივ სისხლნაჟღენთის სახით, ასევე მარცხენა იდაყვის სახსრის უკანა ზედაპირზე, შუბლთან – რა სახის დაზიანებებია მათი გარკვევა და წარმოშობის მიზეზი ცოტა საეჭვო იყო, იმიტომ, რომ გვამი უკვე ლპობაში იყო. ამიტომ, ამ მიდამოებიდან გვამური მასალა იქნა აღებული და გადაიგზავნა ლაბორატორიაში. ისინი მოგვცემენ პასუხს ეს სიცოცხლისდროინდელია თუ სიკვდილის შემდეგ არის განვითარებული", – განაცხადა ირაკლი თოიძემ.
შეგახსენებთ, რომ 28 წლის ირაკლი კვარაცხელია გალის რაიონში, ნაბაკევის სამხედრო ბაზაზე 12 მარტს გაურკვეველ ვითარებაში გარდაიცვალა.