ბიძინა ივანიშვილი ბოტანიკური ბაღის კუთვნილი 14 ათასზე მეტ კვ.მ. ფართობის შემოსაღობად ემზადება

0
411
თბილისის საკრებულომ დღეს თბილისის გენგეგმა უნდა დაამტკიცოს. ოპოზიცია ხმაურიანი სხდომისთვის ემზადება.
 
ოპოზიცია ირწმუნება, რომ დოკუმენტი ბიძინა ივანიშვილის ინტერესებზეა მორგებული. მათ გენერალური გეგმის დამტკიცებამდე ერთი დღით ადრე აღმოაჩინეს, რომ 14 ათასზე მეტ კვადრატულ მეტრ ფართობს, რომელიც ჯერ ბოტანიკურის ბაღის საკუთრებაა და ბიძინა ივანიშვილის სასახლეს ემიჯნება, სტატუსი ეცვლება, რაც ამ ტერიტორიაზე მშენებლობის საშუალებას იძლევა. გარდა ამისა, ოპოზიციის მტკიცებით გენ.გეგმის პროექტის მიხედვით, ივანიშვილის ხეების გადამტანი კომპანიის სასარგებლოდ სტატუსს უცვლიან მზიურის მიმდებარედ რეკრეაციულ ზონას და აქ კორპუსების ჩადგმა იქნება შესაძლებელი.
 
„ბიძინა ივანიშვილმა, რომელიც აპირებს სავარაუდოდ გაფართოვდეს და ახლა 14 ათას კვადრატულ მეტრზე დამატებით ის ზონა დაიდო, რაც მას უნდოდა. სადაც უნდა ყოფილიყო გამწვანება, არის გაცემული საცხოვრებელი კორპუსების მშენებლობის ნებართვა და ეს ნებართვები ძირითადად მიღებული აქვს იმ ადამიანებს, რომლებიც დაკავშირებულები არიან „ქართულ ოცნებასთან“ და ბიძინა ივანიშვილთან."-განაცხადა ლევან ხაბეიშვილმა.
 
ოპოზიციის მიერ გაკეთებულ განცხადებებს აბსურდულ ბრალდებებს უწოდებენ, თბილისის საკრებულოს უმრავლესობის წევრები. „ქართული ოცნების“ დეპუტატები ოპონენტებს, პოპულიზმში ადანაშაულებენ. თბილისის საკრებულოს ფრაქცია ”ქართული ოცნება – დემოკრატიული საქართველოს” წევრის ლევან ჟორჟოლიანის თქმით, ოპოზიციის განცხადებები პოლიტიკური დღის წესრიგის ნაწილია და არ შეესაბამება სიმართლეს.
 
კახა კალაძეc ამტკიცებს, რომ ივანიშვილის სასახლის მომიჯნავე ტერიტორიას სტატუსი არ ეცვლება.
 
კალაძის განცხადებით, ოპოზიცია ცრუობს, როცა ამბობს, რომ ბოტანიკური ბაღის საკუთრებაში არსებულ და ბიძინა ივანიშვილის სასახლის მომიჯნავე 14 ათას კვადრატულ მეტრზე მეტ ფართობს სტატუსი ეცვლება და იქ მშენებლობები დაშვებული იქნება. თბილისის მერის მტკიცებით, ამ ტერიტორიასთან ბიძინა ივანიშვილს კავშირი არ აქვს.
 
„არ არის ეს სწორი, თქვენ შეცდომაში შეგიყვანათ ოპოზიციამ, ტელეკომპანია „რუსთავი2“. ეს სიმართლეს არ შეესაბამება. გაჟღერებული იყო, რომ თითქოს ბიძინა ივანიშვილი იქ აკეთებდა რაიმე მშენებლობას და ა.შ. ეს  რბილად რომ ვთქვათ, არ შეესაბამება სიმართლეს. ბიძინა ივანიშვილს ამ ტერიტორიასთან არანაირი კავშირი არ აქვს,“-აცხადებს კალაძე.

წინა სტატიატერორისტებს, რომლებმაც ახალ ზელანდიაში 40 ადამიანი მოკლეს, ავტომატის მჭიდებზე ქართულენოვანი წარწერები ჰქონდათ
შემდეგი სტატიაოკუპირებული აფხაზეთის სოფელ პირველ ოტობაიადან გატაცებული ლევან ძაძუა გაათავისუფლეს
ტელეკომპანია ოდიშის საინფორმაციო სამსახური