"ნაციონალური მოძრაობა" გალში 29 წლის ირაკლი კვარაცხელიას გაურკვეველ გარემოებაში გარდაცვალების ფაქტს ეხმაურება
ნიკა მელიას განცხადებით, ირაკლი კვარაცხელია ისევე დამამცირებლად შეეწირა საოკუპაციო რეჟიმს, როგორც ეს არჩილ ტატუნაშვილისა და გიგა ოთხოზორიას შემთხვევაში მოხდა.
მელია ამბობს, რომ ხელისუფლებას მსგავს ფაქტებზე ადექვატური რეაგირება არ აქვს და სახელმწიფოებრივი მნიშვნელობის საკითხებზე სიმტკიცეს არ იჩენს.
"ძალიან დამამცირებელი ტრაგედია დაგვატყდა თავს გიგა ოთხოზორიასა და არჩილ ტატუნაშვილის შემდეგ, როდესაც თან დაგვცინეს, თან დაგვამცირეს და ისე მოგვიკლეს ვაჟკაცები. არანაირი შესაბამისი რეაგირება სახელმწიფოს მხრიდან – გიგა ოთხოზორიას მკვლელი ცნობილია, მაგრამ ისე გადაადგილდება როგორც ჩვენ.
"ყველაფერზე არიან დამთმობები, იქ სადაც სწორი და სახელმწიფოებრივი მტკიცე პოზიცია უნდა ჰქონდეთ. მაგალითისთვის ერთის მხრივ ხდება ის, რაც კვარაცხელიას შემთხვევაში – ახალგაზრდა ბიჭი, უბრალოდ მოგვიკლეს და იგივე ოკუპანტებთან, რუსულ "გაზპრომთან" ვაფორმებთ ხელშეკრულებას. ამის გარდა აფხაზეთის მონაკვეთზე რკინიგზის გახსნაზეც ყაბულსაა "ქართული ოცნება." რა არის ეს, თუ არა ანტისახელმწიფოებრივი პოლიტიკა, რომელსაც ახორციელებს ანტისახელმწიფოებრივი ხელისუფლება. შეშინებულები არიან დამფრთხლები არიან თუ შეგნებულად აკეთებენ ამას რაღა მნიშვნელობა აქვს?“-აცხადებს ნიკა მელია.
,,დიდი ალბათობით, ირაკლი კვარაცხელიასთან დაკავშირებით მოხდა იგივე რამ, რაც არჩილ ტატუნაშვილთან – ეს ადამიანი არის მოკლული, – ამის შესახებ ფრაქცია „ნაციონალური მოძრაობის“ თავმჯდომარე რომან გოცირიძემ განაცხადა.
დეპუტატი მსგავს შემთხვევებს დაუსჯელობის სინდრომს უკავშირებს.
„საქართველოს ხელისუფლებამ არ გამოიყენა მის ხელთ არსებული ბერკეტები, მიუხედავად იმისა, რომ პარლამენტმა მიიღო „ტატუნაშვილი-ოთხოზორიას სია“, რომელსაც ევროპის სახელმწიფოებიც მიესალმნენ. ამის იქით არც ერთი ნაბიჯი არ გადადგმულა და ფაქტობრივად, ამ პასიური მდგომარეობით წაახალისეს ის ვითარება, რაც ხდება. დაუსჯელობის სინდრომი არის ყველაზე მთავარი მიზეზი მომხდარი უბედურებების. საქართველოს ხელისუფლების ლოიალურობა და ასეთი მფრთხალი რეაგირება აძლევს რუსეთს და სეპარატისტებს საშუალებას, მსგავსი დანაშაულები ჩაიდინონ“, – აღნიშნა რომან გოცირიძემ.