საქართველოს მოქალაქისთვის უცხო ქვეყანაში  არალეგალად წასვლისაა და უკანონოდ დარჩენის ხელშეწყობა დასჯადი ხდება.

 

მას, ვინც წინასწარ იცის,  რომ პირი არალეგალურად გეგმავს ცხოვრებას და მას მატერიალური სარგებლის სანაცვლოდ დახმარებას უწევს, თავისუფლების აღკვეთა ემუქრება. 

 

უკანონო მიგრანტების ხელშეწყობისთვის სასჯელი უფრო მძიმეა თუ დანაშაულს ორგანიზებული ჯგუფი ჩაიდენს. ამ შემთხვევაში თავისუფლების აღკვეთა ოთხიდან შვიდ წლამდე იქნება

 

თუ დანაშაულს ტურისტული ან სხვა კომპანია ჩაიდენს, მას საქმიანობის უფლება ჩამოერთმევა და დაჯარიმდება.

 

ცვლილებების ინიციატორი საპარლამენტო უმრავლესობის 12 დეპუტატია. პარლამენტში ფიქრობენ, რომ რეგულაციების გამკაცრებით უკანონო მიგრაცია შემცირდება.

 

ოპოზიციაში კი დარწმუნებულები არიან, რომ კანონის აღსრულება შეუძლებელი იქნება. უცხოეთში გაშვებული მგზავრის არალეგალად დარჩენაზე ტურისტულ კომპანიას პასუხი მხოლოდ იმ შემთხვევაში მოეთხოვება, თუ გამოძიება დაადგენს, რომ კომპანიამ მისი განზრახვა წინასწარ იცოდა.

 

ბოლო ათი წლის განმავლობაში ქვეყნიდან მილიონ ნახევრამდე ადამიანი გაემგზავრა და აღარ დაბრუნებულა. ევროკავშირთან უვიზო მიმოსვლის ამოქმედების შემდეგ ქართველი მიგრანტების რაოდენობა ევროპაში მკვეთრად გაიზარდა, რის გამოც საქართველოს ხელისუფლებამ გაფრთხილება მიიღო. გაზრდილია თავშესაფრის მაძიებელთა რაოდენობაც. ბოლო რამდენიმე თვის განმავლობაში ხელისუფლებამ ევროპელი კოლეგებისგან რამდენიმე შენიშვნა მიიღო. მათ შორის სკანდინავიის ქვეყნებიდან, სადაც ქართველ ემიგრანტთა რაოდენობა მნიშვნელოვნად იზრდება

 

. "ქართულ ოცნებაში" იმედოვნებენ, რომ ახალი საკანონმდებლო ცვლილებები ევროკავშირისთვის იმის ნიშანი იქნება, რომ ხელისუფლება უკანონო მიგრაციას ებრძვის.

 სისხლის სამართლის კოდექსში შესატანი ცვლილებები ბიუროს წარედგინა, ამის შემდეგ საკითხის განხილვა კომიტეტებსა და პლენარულ სხდომაზე მოხდება.