სალომე ზურაბიშვილი ხვალ პარლამენტში მივა. როგორც ტრადიციულ ბრიფინგზე პრეზიდენტის პრესსპიკერმა განაცხადა, სალომე ზურაბიშვილი პარლამენტში ისაუბრებს ყველა იმ საკითხზე, რომელიც საზოგადოებისთვის საინტერესოა.
ახალი რეგლამენტით სალომე ზურაბიშვილს კითხვებზე პასუხის გაცემა არ მოუწევს.
პრეზიდენტის ანგარიშის დასრულების შემდეგ სიტყვით გამოვლენ იმ ფრაქციების წარმომადგენლები, რომლებიც არ არიან გაერთიანებული არც საპარლამენტო უმრავლესობაში და არც უმცირესობაში. ამის შემდეგ დაგეგმილია საპარლამენტო უმრავლესობისა და უმცირესობის ლიდერების სიტყვით გამოსვლა.
„ნაციონალური მოძრაობა“ საქართველოს პრეზიდენტ სალომე ზურაბიშვილის პარლამენტში გამოსვლას არ დაესწრება.
თინა ბოკუჩავს განცხადებით, „ნაციონალური მოძრაობა“ სალომე ზურაბიშვილის, როგორც პრეზიდენტის ლეგიტიმურობას არ აღიარებს.
„არ ვაპირებთ ხვალინდელ განხილვაზე დასწრებას. სალომე ზურაბიშვილის ლეგიტიმურობას არ ვაღიარებთ. ეს არის ადამიანი, რომელსაც ბიძინა ივანიშვილმა საპრეზიდენტო სკამი უყიდა. როგორც 90-იან წლებში ყიდულობდნენ ცუდი სტუდენტებისთვის უნივერსიტეტებში სკამებს. არ ვაპირებთ მონაწილეობის მიღებას იმ განხილვაში, სადაც არალეგიტიმური ე.წ. პრეზიდენტი მიიღებს მონაწილეობას. არ მგონია, ხუთი წლის მანძილზე ეს ნაყიდი პოსტი შეინარჩუნოს, მათ შორის იმიტომ, რომ მის წინააღმდეგ სტრასბურგის სასამართლოში სარჩელის შეტანას ვაპირებთ. სწორედ, სტრასბურგის სასამართლოს გადაწყვეტილებით მოუწევს, დატოვოს პრეზიდენტის სკამი, რომელიც მოპარული არჩევნების შედეგად არალეგიტიმურად დაიკავა“, – განაცხადა თინა ბოკუჩავამ.